10.2 C
Pontevedra
Venres, 29 de Marzo de 2024
Máis
    HomeLouriñaSalceda de CaselasUnanimidade en Salceda para pedir a reposición do Acueducto do Pontillón

    Unanimidade en Salceda para pedir a reposición do Acueducto do Pontillón

    O Pleno da Corporación Municipal de Salceda aprobou por unanimidade a moción presentada polos grupos de goberno (MS e PSOE) para a protección do patrimonio natural fluvial existente no río Caselas, pedindo expresamente a reposición do acueducto do Pontillón entre as parroquias de Caldelas e Arantei ,que recentemente foi desmontado durante a execución das obras de “Mellora da permeabilidade no río Caselas”, por parte da Confederación Hidrográfica Miño-Sil.

    A “Mellora da permeabilidade no río Caselas” forma parte do proxecto “Migra-Minho”, desenvolvido pola Consellería de Medio Ambiente da Xunta de Galicia e o Instituto da Conservaçao da Natureza e das Florestas portugués. Este proxecto ten unha grande importancia para o medio ambiente e para o biodiversidade dos nosos ríos. O problema chega, cando non se ten en conta a protección do Patrimonio Cultural e Etnográfico e se tratan como meros obstáculos para o remonte das especies migradoras.

    O concelleiro de Patrimonio, Alex Rodríguez, defendeu a moción lembrando que os elementos como muíños, peiraos, levadas, pesqueiras, acueductos e batáns son bens patrimoniais que forman e formaron parte da nosa economía de subsistencia a través dos séculos, da nosa historia, da nosa etnografía, da nosa poesía, das nosas cantigas, e como non, da nosa memoria.

    A sorpresa neste punto deuna o Partido Popular de Salceda, que decidiu infravalorar a iniciativa, manifestando que esta non era de interese para a veciñanza de Salceda a pesar de estar a falar do río que dá nome ao municipio.

    Loli Castiñeira, alcaldesa de Salceda, trasladoulle o seu agradecemento ás promotoras da moción, nomeadamente a Silvia Soutelo, presidenta da Asociación patrimonial e etnográfica Acueducto de Caldelas, pola defensa férrea que están a facer do patrimonio vinculado ao Río Caselas, facendo súas as palabras da Presidenta: “O patrimonio galego será tido en conta e respetado se todos e todas o poñemos en valor e velamos por el”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.