O Partido Socialista de Salceda vén de dar resposta ás distintas acusacións que o Partido Popular leva vertidas nas últimas semanas en relación coa postura do grupo socialista no procedemento simplificado do IBI. Verónica Tourón lémbralle ao PP que o PSOE, como parte do actual Goberno de Salceda, “manten a mesma posición e traxectoria dos últimos anos” polo que as acusacións sobre “cambios de posición, son totalmente infundadas”.
A portavoz socialista e tenente de alcaldesa de Salceda, lembra que no procedemento levado a cabo por catastro no ano 2015 “dende o PSOE xa solicitabamos as medidas que agora se están poñendo en marcha dende o Concello: a rebaixa do tipo impositivo, aprazamentos para que Catastro emita os recibos de forma escalonada, bonificacións nos terreos non edificables, bonificacións sociais ou o servizo de información á veciñanza”.
Considera Verónica Tourón que o PP debe “retractarse das súas acusacións sobre o noso grupo” xa que, engade, “estamos facendo o que pedíamos naquel momento e o que debemos facer: xestionar e poñer solucións aos problemas da veciñanza”.
O Grupo Socialista lembra que, en todo caso, “este é un procedemento irreversible” ao mesmo tempo que queren deixar ben claro que “en ningún momento foi solicitado nin iniciado polo Concello, senón que ven avalado por unha modificación lexislativa do Partido Popular no ano 2015”. Tourón recoméndalle ao Partido Popular “que deixe de sementar crispación e que arrimen a ombreira nun problema que foi creado polo seu propio partido e que preocupa as veciñas e veciños de Salceda”.
Recalca Verónica Tourón que dende o Concello “traballouse dende un primeiro momento na procura de solución para paliar os efectos deste procedemento” e mentres “o grupo da oposición dedicouse a moldear a súa mensaxe adaptándoo aos avances de Goberno municipal”. Nese sentido, lembra a portavoz socialista de Salceda de Caselas que os populares “pasaron de solicitar unha paralización da revisión, cousa inviable, a solicitar cuestións que o equipo de Goberno xa ten resoltas ou en estudio. Dedicáronse a ir creando incertidume e dando información incompleta, chegando a felicitarse e presumir dun traballo que realizou o equipo de Goberno”.
Os socialistas de Salceda consideran que o partido da oposición “está actuando con total irresponsabilidade nun tema moi serio e cun discurso que so provoca enfrontamento”. Fai, en todo caso o PSOE un chamamento “a que traballen conxuntamente na procura de solucións e que deixen de colgarse medallas por un traballo que non están facendo eles”.
“A veciñanza merece seriedade e rigorosidade dun grupo que a veces esquece que pertence a corporación local e que mostra unha actitude moi afastada do que debe ser a representación institucional”, conclúe Verónica Tourón.
