O vindeiro venres, 8 de febreiro, ás 19:00 horas, o Centro Cultural da Guarda acollerá a presentación da Marea da Guarda, nun acto no que intervirán Pancho Casal, deputado de En Marea; Lidia González Alonso de En Marea A Guarda e Xoán Lois Villa de Movemento Oia En Marea. Media hora máis tarde, logo do acto de presentación, En Marea presentará a súa Proposición de Lei para paliar a pobreza enerxética e acadar unha mellora significativa para os fogares máis vulnerables.
Esta xornada, sinala En Marea, “ademais de presentar a nosa proposta coma a alternativa que inclúe as medidas máis integrais, actualizadas, necesarias e xustas que houbo ata agora no noso país”, servirá tamén para explicar aos e ás presentes, con detalle, os excesos dos tipos de tarifas e contratos enerxéticos cos que contamos a día de hoxe, “as baldías medidas da Xunta de Galicia a través do seu Bono Social e a posibilidade de obter unha mellora no aforro no teu consumo”, afirma En Marea.
