Na tarde onte domingo, o Concello de Arbo recibiu unha comunicación da Comandancia Naval do Miño na que se informaba aos concellos de Arbo, Crecente, As Neves e Salvaterra de Miño que, logo das pertinentes consultas á Delegación do Goberno en Galicia, procedíase a reapertura da pesca tradicional no río miño dende as este luns 4 de maio.
A decisión adóptase despois da reunión mantida o pasado sábado entre a alcaldesa de Salvaterra, Marta Valcárcel e os alcaldes de Crecente, Arbo e As Neves, –Julio César García-Luengo, Horacio Gil e Xosé Manuel Rodríguez Méndez– na que os rexedores locais falaban de “agravio comparativo” que no treito portugués do río Miño o Goberno luso decidira autorizar a pesca tradicional, mentres que no mesmo río, pero na beira galega, estivera prohibida.
No seu escrito, do que demos conta neste xornal, dirixido á Delegación do Goberno en Galicia solicitaban a reapertura da tempada de pesca tradicional nas ‘Pesqueiras’ do treito internacional do Miño, “tendo en conta que este tipo de actividade esta considerada como pesca tradicional con destino autoconsumo”.
O alcalde de Arbo, Horacio Gil, agradeceu hoxe “a sensibilidade amosada cos catro concellos e cos pescadores de lamprea de estes municipios”. O rexedor recorda que tal e como informa a Comandancia Naval do Miño, para o desenvolvemento desta actividade, “os pescadores con licenza en vigor de pesca tradicional desde pesqueiras, deberán cumprir as medidas establecidas polo Goberno para previr o contaxio, así como a obrigación do emprego de chaleco salvavidas”.
