O pleno da Cañiza desta semana acordou a actualización de 3 impostos e 3 taxas de servizos públicos, marcada pola actual situación económica do Concello que arrastra unha débeda (antes ante os proveedores e agora co Ministerio de Facenda) que todos os cañicenses teñen que pagar ata devolver os 2.769.008,52 € en facturas a proveedores que quedaron sen pagar en anos e mandatos anteriores, e que houbo que declarar en 2022 e 2023 a través de sendos Mecanismos de Pagos a Proveedores tramitados ante o Ministerio de Facenda.
Unha débeda que mensualmente hai que devolver en forma de retención a conta da participación do Concello nos Tributos do Estado. Esta devolución a día de hoxe é de 46.000 €/mes (552.000,00 €/ano), pero que se está tentando rebaixar, elaborando un Plan de Axuste e Saneamento financeiro para minorar esta devolución a 23.000,00 €/mes (276.000,00 €/ano), ampliando o prazo de devolución.
Sumando o déficit dos principais servizos municipais (-368.568,25 €) e a devolución a Facenda (-276.000,00 € , sempre que Facenda o autorice) supoñen unha carga anual para o Concello de -644.568,25 euros.
Unha situación que sumada á carestía da enerxía e a suba dos prezos do mercado, xunto coas subidas salariais do persoal municipal, obriga a ter de actualizar a fiscalidade municipal.
Unha medida comedida que non é suficiente para poder equilibrar os gastos e os ingresos da prestación do servizos, xa que a subida repercutida podería NON CHEGAR siquera para cubrir a devolución ao Ministerio de Facenda.
ACTUALIZACIÓN DOS IMPOSTOS DO IBI, DO IAE E DE VEHÍCULOS
Este 3 de novembro o Pleno acordou a actualización do imposto do IBI (que afecta a todos os veciños que teñen vivendas, bens e propiedades inmobles) que sube en Urbana un 15% e en rústica un 10%. Ademais, sube un 20 % para os valores máis elevados en urbana en canto á súa clasificación (industrias, áreas comerciais, etc).
O imposto do IAE (de actividades económicas) increméntase en torno a un 10% en todo o conxunto.
E o imposto de vehículos (de rodaxe), paralizado dende hai case 20 anos, actualízase tomando como referencia as tarifas do Concello de Ponteareas do ano 2018.
ACTUALIZACIÓN DAS TAXAS DOS SERVIZOS DE SANEAMENTO, LIXO E AGUA
O Alcalde explicou esta mañá que o Concello subirá as taxas destes 3 servizos.
Na taxa do Servizo Municipal de Saneamento, cuns costes de 253.218,64 €, uns ingresos de 55.678,55 € e un déficit de -197.540,09 €, a subirá será dun 20 % no casco urbano. Ademáis se incorporarán as vivendas no rural que teñen o servizo pero que nunca pagaron polo mesmo e polo tanto é de aplicación a Lei que obriga a pagar pola súa prestación.
No caso do Servizo Municipal de Recollida de lixo, cuns costes de 305.252,28 €, uns ingresos de 173.716,58 euros e un déficit de -131.535,70 €, SUBIRÁ no casco urbano 1,00€/mes e nas parroquias 1,50 €/mes. Ademais, aqueles veciños que soliciten a recollida de voluminosos terán que abonar unha taxa de 10 €/recollida. Este servizo continuará sendo gratuito se o residuo se leva directamente ao punto limpo.
A taxa do Servizo Municipal de Auga cuns costes de 154.287,45 €, uns ingresos de 114.794,99 € e un déficit de -39.492.46 €, subirá tamén un 20 %, pasando dunha cuota fixa de 6 € a 7,20 €.
Con esta actualización a estimación de recaudación é de 116.402,64 € máis que sumados aos 344.190,12 euros de ingresos, ofrece unha suma de 460.592,76 € para estes 3 servizos. Con todo, os costes de prestación superan os 712.758,37 €, polo que o saldo continúa sendo negativo en -252.165,61 €.
