É Noticia

O curso escolar en Galicia comezará o 10 de setembro coa incorporación gradual do alumnado. Os primeiros en incorporarse ás aulas o xoves 10 serán os alumnos de 4º curso de Educación Infantil (3 anos) e 5º de Infantil; 1º, 2º e 3º de Educación Primaria; e Educación Especial. Ao día seguinte, o 11 de setembro, iniciarán o curso escolar os alumnos de 6º de Educación Infantil e os de 4º, 5º e 6º de Educación Primaria. Deste xeito, o venres día 11 estarían xa incorporados ás aulas a totalidade do alumnado das etapas de Infantil e Primaria.

O avistamento de grupos de orcas nas costas galegas, levou a Salvamento Marítimo a facer un comunicado para que as embarcacións non se acheguen a elas. Este radioaviso publicouse a última hora do pasado domingo e ditaba o seguinte: "Avistamento de grupos de orcas en augas das Rías Baixas. Solicítase a todas as embarcacións que, en caso de avistamento non tenten aproximarse, dean amplo resgardo e informen á estación costeira máis próxima ou a Salvamento Marítimo Finisterre".

A Deputación de Pontevedra convocou ao Comité de Seguridade e Saúde a unha reunión a próxima semana para avaliar a adaptación dos protocolos e de novas medidas ante a nova situación da Covid19 e os casos positivos na institución, aínda que derivan de contaxios rexistrados no ámbito privado.

O programa de rutas ornitolóxicas 'Voando nas Rías Baixas', que a Deputación de Pontevedra desenvolve en colaboración con SEO Birdlife, segue colleitando éxitos tras esgotarse en apenas 24 horas as quince prazas dispoñibles para o súa quinta e última saída desta edición, que conta tamén cunha lista de agarda doutras vinte persoas. A ruta levarase a cabo este próximo domingo, 6 de setembro, e achegará ás persoas participantes ata a Serra do Suído, que se estende polos concellos da Lama, Fornelos de Montes e Covelo.

A Xunta de Goberno da Deputación de Pontevedra aprobou as bases para a concesión de axudas a escolas de música dependentes de asociacións sen ánimo de lucro para este ano 2020. En total, a institución provincial destina 80.000 euros a esta iniciativa que ten por obxecto subvencionar os gastos correntes e de persoal necesarios durante este ano.

Tras o éxito das dúas primeiras Depoandainas, a Deputación de Pontevedra abriu este luns 31 de agosto o prazo de inscrición para a terceira e última das rutas programadas para este verán. Nesta ocasión as persoas participantes percorrerán o Val das Fadas, no concello da Cañiza, o domingo 20 de setembro.

A Deputación de Pontevedra, a través de SmartPeme, oferta a primeira semana de setembro catro novas accións formativas impartidas de xeito online, enmarcadas na carteira de obradoiros que se imparten de forma telemática. As accións, con 10 prazas cada unha, versan sobre xestión de redes sociais, ferramentas para a mellora da web, ciberseguridade, copywritting, ferramentas para empresas turísticas, promoción das empresas ou técnicas de marketing.

“A formación ten que ser a grande prioridade, non podemos mirar a outro lado aínda que esteamos nunha situación de pandemia”. Baixo esta premisa, a presidenta da Deputación de Pontevedra, Carmela Silva, informou da xeración de crédito para o programa “Practicum Depo 2020”, aprobada este venres pola Xunta de Goberno do ente local.

A Deputación de Pontevedra segue a camiñar na “Re-Acción Cultural” da provincia coas dúas novas edicións dos Roteiros Literarios e os de Arquitectura que se levarán a cabo nos meses de setembro e outubro por diversos espazos da provincia. A presidenta da institución provincial, Carmela Silva, destacou hoxe na presentación destas actividades a colaboración respectiva da Asociación de Escritoras e Escritores en Lingua Galega (AELG) e da Academia Galega de Belas Artes, cuxos representantes Césareo Sánchez Iglesias e Celestino García Braña participaron no acto.

A Deputación de Pontevedra abriu este venres o prazo de inscrición para a quinta das rutas ornitolóxicas programadas dentro da terceira edición da iniciativa “Voando nas Rías Baixas”, organizada pola institución provincial en colaboración con SEO Birdlife. Esta última ruta permitirá ás persoas que asistan coñecer a riqueza ornitolóxica e paisaxística da Serra do Suído, nos concellos da Lama, Fornelos e Covelo. Ofértanse 15 prazas para a excursión guiada de carácter gratuíto que terá lugar o próximo domingo 6 de setembro.

Dar a coñecer a provincia de Pontevedra á vez que se desfruta do deporte ao aire libre e da natureza son algúns motivos polos que a Deputación de Pontevedra puxo en marcha as “Rutas Autoguiadas”, un catálogo con 13 itinerarios supervisados que poden seguirse facilmente a través de aplicacións móbiles ou dos GPS. As fichas das rutas, valoradas e clasificadas pola Deputación, están dispoñibles no sitio web do ente provincial (www.depo.gal) e ofrecen información sobre a distancia, a dificultade, as altitudes e os protocolos en caso de accidente. Os itinerarios discorren polos concellos de Moraña, Forcarei, O Grove, Redondela, Pontevedra, Catoira, Lalín, Vigo, O Rosal, Mondariz, Mondariz-Balneario, Silleda, Oia, A Guarda, Cangas e Bueu.

“Musigal”, o programa cultural da Deputación de Pontevedra, continúa espallando a música galega cun concerto que se desenvolverá este sábado 29 de agosto ás 22.30 horas na Alameda Talo Río, no concello de Soutomaior. Nel participará o grupo Óscar Ibáñez & Tribo, o expoñente do folk galego capitaneado polo gaiteiro natural de Poio, Óscar Ibáñez.