Nigrán

O Concello de Nigrán aprazará ao outono a celebración da gala dos IX Premios Nigrán, prevista para este sábado 18 de abril, e proporá modificar o formato de xeito excepcional para recoñecer as diferentes iniciativas na loita contra o Covid-19 no municipio. O goberno local trasladará a oposición e ás diferentes entidades que con anterioridade á crise sanitaria xa realizaran propostas, a opción de que estas se pospoñan para a décima edición, xa no 2021.

O Concello de Nigrán retoma a actividade nas obras adxudicadas despois de dúas semanas de interrupción por mor do estado de alarma decretado co Covid-19. Así, hoxe finalizaron as obras de pavimentación e humanización na rúa Rúa Vista ao Mar (Lourido) adxudicadas a empresa NAROM S.L por un importe de 42.896,61 € e cunha partida provinte dos proxectos incluídos polo goberno de Nigrán no Plan Concellos 2019.

Co obxectivo de seguir analizando como a Zona Franca pode tomar medidas encamiñadas para minorar o impacto real do Covid-19 na economía da nosa área, David Regades mantivo unha reunión telemática coa xunta directiva da comunidade de propietarios de Porto do Molle. Como primeira medida, Zona Franca duplicará durante os próximos tres meses a súa cota á comunidade de mantemento para que as empresas non teñan que realizar ningún desembolso.

O Concello de Nigrán recibiu a donación de 250 mascarillas hixiénicas donadas pola firma de moda viguesa ‘Chill&Buy’ e que foron confeccionadas artesanalmente por María Victoria Domínguez con telas coa estampa de Frida Kahlo. Estas mascarillas están a ser distribuídas polo Concello entre persoal de supermercados de Nigrán ou de residencias de anciáns e colectivos que precisen o seu uso na súa incorporación ao traballo.

O confinamento provocado polo coronavirus e o conseguinte estado de alarma, vén de afectar de xeito moi directo ás asociacións protectoras de animais que miran como diminúen os seus recursos económicos e afrontan situacións, ás veces dramáticas, que poñen en perigo a supervivencia dos animais que teñen ao seu coidado. Ao igual que o Concello de Ponteareas que axudaba económicamente á protectora 'Os Biosbardos', Nigrán optaba por outro xeito de axuda a 'Baisenpulgaqs': entregar alimentos especiais para os cans e gatos enfermos e que teñen necesidades alimentarias específicas.

A Deputación de Pontevedra aprobou por resolución presidencial a concesión de dúas achegas por preto de 190.000 euros ao Concello de Nigrán para desenvolver actuacións de saneamento e abastecemento na zona da Carrasca e de saneamento na rúa Carousa.

O Concello de Nigrán iniciou hoxe e continuará mañá co reparto de roscas nas cinco residencias de anciás do municipio e no centro de saúde da Xunqueira (centro de referencia do Covid-19 na comarca) como felicitación da Pascua e sinal de cariño do pobo de Nigrán a traballadores e residentes nestes intres tan complicados para eles especialmente.

O Concello de Nigrán promoverá tamén a organización de ‘aniversarios de balcón’ para os máis anciás do municipio. Ante o éxito da iniciativa municipal lanzada a semana pasada para festexar os aniversarios dos cativos convocando á veciñanza máis próxima a través das redes sociais para cantarlle e mesmo desprazándose Protección Civil para entregar un agasallo, o Concello quere incluír tamén aos anciás de Nigrán, a poboación máis vulnerable ante o Covid-19.

Veciñanza de Nigrán e policía local non só do municipio, senón dos outros concellos do Val Miñor –aos que se sumaron axentes do Porriño e Redondela–, participaron hoxe no emotivo acto de despedida do seu compañeiro Víctor Fernando Lomba González, de 53 anos de idade, que finaba repentinamente esta pasada noite.

O Concello de Nigrán agradece publicamente á Subdelegación de Goberno de Pontevedra e á brigada Brilat a celeridade e bo facer na desifección o pasado sábado da residencia de maiores Serge Bellavista, ubicada en Priegue, onde o día 1 de abril o test do covid-19 arroxara un resultado postivo nunha anciá que estivo totalmente asintomática. Ante a petición do Concello e da residencia de realizar unha desinfección das instalacións a resposta foi inmediata e o traballo inmellorable.

O Concello de Nigrán emprendeu onte un reparto especial a domicilio para familias vulnerables a base fundamentalmente de alimentos cárnicos (polo e lombo de porco) pero tamén de productos menos cotiás como café, cacao ou fariña. En total, o Concello adquiríu no pequeno comercio do municipio 1.000 € nestas compras destinadas a 55 familias e que se suman ao reparto ordinario semanal de produtos non perecedoiros e ao extraordinario da semana pasada a base de froitas, ovos e verduras e produtos de hixiene corporal e limpeza.

O Concello de Nigrán reuníu aos especialistas en entretemento infantil do municipio para lanzar desde este sábado a través das redes sociais do consistorio (Facebook Concello De Nigrán, youtube e na web www.nigran.es) pequenos vídeos con contidos exclusivos destinados aos cativos. A iniciativa encádrase na campaña municipal ‘Paciencia, Cariño e Calma’ que pon o punto de mira nos pequenos da casa, os que máis ríxidamente sufren o confinamento.