A Biblioteca de Chapela levará o nome da poetisa e tradutora Xela Arias

O Pleno do Concello de Redondela acordou, por unanimidade, aprobar a proposta de nomear á biblioteca de Chapela co nome da poetisa e tradutora luguesa Xela Arias. A proposta foi promovida dende a biblioteca do Instituto de Chapela, onde Xela Arias foi profesora. A concelleira de Cultura do Concello de Redondela, Teresa París, expuxo a proposta, levada previamente a Comisión, para nomear a esta biblioteca que forma parte das Bibliotecas Públicas Municipais de Redondela que teñen como central á Biblioteca «P. M. Valle-Inclán».

O Multiúsos da Xunqueira acolle o contacontos «A bolboreta Roseta»

Este próximo venres, día 14 de decembro, o Auditorio do Multiúsos da Xunqueira de Redoncela acollerá o contacontos «A bolboreta Roseta», actividade que forma parte dunha programación especial de Nadal "pensada especialmente para os máis pequenos e pequenas da casa". O recoñecemento de Redondela por parte da UNICEF como Cidade Amiga da Infancia, fai que se preste unha especial atención a poboación infantil no programa.

Redondela acolle «Bailemos todos polos peques en Galego» a favor de UNICEF

O Pavillón Multiusos de Redondela (Vigo) acollerá, o vindeiro sábado 15 de decembro a partir das 17:30 horas, a «I Exhibición Solidaria Bailemos todos polos peques en Galego», que a Asociación Piyopi Animación organiza para a campaña Pingas para Níxer de UNICEF Comité Español. Pingas para Níxer ten como obxectivo impulsar o cumprimento dos dereitos da infancia en Níxer, mediante programas que logren que os nenos e nenas teñan acceso á saúde, a educación, a igualdade e a protección.

Cedeira pecha 'Cociña e alimentación, hábitos saudables' do programa 'Conectadas'

A Deputada Provincial de Cohesión Social e Xuventude,Digna Rivas, entregou os correspondentes diplomas aos veciños e veciñas de Cedeira, en Redondela, que participaron no obradoiro 'Cociña e alimentación, unha iniciativa da Deputación de Pontevedra que tiña como finalidade a promoción e desenvolvemento da igualdade. Nestas actividades formativas participan tanto homes coma mulleres co obxectivo de promover o traballo en igualdade.

Atrasos na ampliación da ponte da vía en Saxamonde

O voceiro do BNG, Xoán Carlos González, cualificou de "vergoñenta" a actitude do Goberno Redondela cos veciños e veciñas de Saxamonde logo de que a ampliación da ponte acumule xa seis meses de atrasos. “Dispoñen do financiamento e do Proxecto dende hai un ano. Anunciaron en xuño o inicio inminente das obras, agora volven adxudicarllo a unha nova empresa”, denuncia o portavoz nacionalista. A actuación afecta á ponte sobre a vía férrea no barrio de Casal do Monte, en Saxamonde.

O Obradoiro de Emprego de Redondela inicia o mantemento do Paseo da Portela

Esta semana os alumnos do Obradoiro de Emprego Xoven do Concello de Redondela comezaron os traballos de carpintería e vernizado no Paseo da Portela. Unha vez realizadas as horas de formación teóricas comezaron a impartirse parte das 720 horas prácticas que inclúe este obradoiro, do que forman parte 16 alumnos dos cales 8 se forman na especialidade de carpintería e vernizado e 8 en deseño gráfico.

AER denuncia a carencia de etilómetro por parte da Policía Local

A Agrupación de Electores de Redondela (AER) vén de denunciar distintas carencias que ten a Policía Local redondelá logo que, segundo sinala a Agrupación, membros da Policía Local de Redondela lles fixeran chegar as súas demandas laborais "que de xeito reiterado están sendo desatendidas polo Goberno local", sinalan. Segundo AER, unha das carencias é a do etilómetro, de tal xeito que para facer probas de alcolemia, "teñen que requirir á Garda Civil de Tráfico ou a Policías Locais doutros concellos".

Suscribirse a este canal RSS