10.8 C
Pontevedra
Martes, 19 de Marzo de 2024
Máis
    HomeÉ NoticiaO documental 'Acorda' sobre a memoria histórica da provincia opta ao premio...

    O documental ‘Acorda’ sobre a memoria histórica da provincia opta ao premio Xacobeo

    A peza estrarase oficialmente dentro do ciclo ‘Panorama Galicia’ no Teatro Principal ourensá de maneira previa á gala de clausura

    O documental ‘Acorda. Cartografía Musical da Memoria Histórica de Pontevedra’, a peza audiovisual que pretende poñer en valor lugares e feitos de memoria na provincia a través da música producida polo departamento de Memoria Histórica da Deputación de Pontevedra, chegará este venres ao Ourense Film Festival con opcións a gañar o Premio Xacobeo á mellor produción galega.

    ‘Acorda’ estrearase oficialmente no Teatro Principal ourensá ás 17 horas de maneira previa á gala de clausura da sección oficial do festival, onde se entregarán todos os galardóns. Optará ao anterior Premio Galicia, que nesta edición pasou a denominarse Premio Xacobeo, un galardón transversal para calquera película de produción ou coprodución galega que participe no certame e que será concedido por unha comisión formada pola Fundación Carlos Velo, Deputación de Ourense e Xunta de Galici,a e dado a coñecer, a diferenza dos outros premios, no mesmo momento da gala.

    A produción pontevedresa será proxectada dentro do ciclo temático ‘Panorama Galicia’, no que tamén se incluíron pezas como ‘Clown’s planet’, de Héctor Carré, ‘Devolvendo o golpe’ de Carlos Prado; Doppelgänger, de Paco Guitián e Tadeo Publieso; ‘El encuentro’, de Marcos Fernández; ‘No hay futuro’, de Ignacio Benedetti; Capuchóns ‘de Íñigo Rolán’; ‘Os tempos mortos (do Fürer)’ de Daniel R. González, ‘Polavisión: un fallo instantáneo’, de Álex López; ‘Tierra de leche y miel’ de Héctor Domínguez, Carlos Mora e Gonzalo Recio; e finalmente ‘Persoas SA’ de Carmen PG Granxeiro, sendo a única que aborda a temática da memoria histórica no país.

    Fotografía de Rafa Estévez ©

    A peza documental xurdiu trala idea orixinal do departamento de Memoria provincial dirixido por María Ortega, quen outorgou a dirección artística a Uxía e Marina Carracedo, xunto a Lucas Terceiro na realización, a Lois Pérez  no guión e a Montse Fajardo  como asesora de contidos.

    No proxecto  participan voces moi diversas e reivindicativas como as de Emilio Rúa e Silvia Penide, Ugia Pedreira e Marina Oural, Sheila Patricia, Eladio Santos, Tanxugueiras, Ezetaerre e a propia Uxía e Su Garrido, e un elenco formado por Tero Rodríguez, Andrés Giráldez, e Eduardo R. Cunha (‘Tatán’), entre outros, xunto a testemuñas reais de persoas como Queta Molas ou Blanca Francés.

    Espazos

    Os espazos escollidos para a grabación de ‘Acorda’ foron  a antiga ‘Escola Normal’ en Pontevedra, lugar onde se traballaba nos valores de liberdade; a Ponte Regueiro, en A Estrada, onde asasinaron a veciños da comarca do Deza-Tabeirós e do Salnés; para seguir ata o Pozo da Revolta, en Marín, onde se fala da represión contra as mulleres; a praia de Massó en Cangas onde foron arroxados os mártires de Anguieiro, e onde se representa o trauma que para as familias supuxo non poder chorar ás vítimas; a praia de Alcabre (Vigo), onde se fala do sufrimento das mulleres que quedaron e a súa loita porque se lles faga xustiza, para que se loite contra a impunidade; a Bombardeira ou Volta dos nove, onde están as nove cruces que durante décadas apareceron pintadas na curva de Baredo, onde foron asasinados nove homes, como acenos de resistencia; a Volta da Moura, onde se pon de manifesto a necesidade que ten a xeración neta e bisneta de rachar co silencio, para que non se dea un paso atrás na loita contra os extremismos; e finalmente a Illa de San Simón, o grande símbolo da memoria e a solidariedade na Galicia, nunha reclamación para que sexa denominada ‘Illa da Memoria’.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.