A Estación Fitopatolóxica Areeiro vén de lanzar un novo aviso fitosanitario no que advirte do aumento de síntomas de black rot e aconsella incrementar a vixilancia ante o oídio. Aínda que afirma que o estado fitosanitario das viñas é excelente, recomenda vixiar síntomas de mildio e, naquelas nas que se vaia cumprir o prazo de protección do produto, aplicar tratamento antimildio, antioídio e contra o black rot. Amais, e debido ás condicións de humidade e sol, Areeiro aconsella aplicar tamén tratamento antimildio nas plantacións de pataca e outras hortícolas.
Esta semana téñense detectado moitos síntomas de black rot en acio. Aínda que o tempo previsto non será o máis favorable á evolución da enfermidade, é preciso incrementar a vixilancia en todas as comarcas da provincia e, onde haxa brotes do fungo, elixir un funxicida antimildio e antioídio rexistrado tamén para esta enfermidade. Tamén se teñen observado acios con presenza de micelio do oídio nalgúns predios. Por esta situación, Areeiro recomenda incrementar a vixilancia, tendo amais en conta que este é un dos momentos máis críticos da enfermidade.
En xeral, o centro dependente da Deputación asegura que o estado fitosanitario das viñas é excelente e que soamente se observaron síntomas de mildio nos predios que sufriron un forte ataque cando coincidiron as primeiras condicións extremadamente favorables coa floración. Boa parte das viñas están tratadas, sen embargo cómpre estar alerta, en especial naquelas nas que se vaia cumprir o prazo de protección teórico e onde aínda queden síntomas non ben controlados. Tamén no que respecta á vide, Areeiro recomenda eliminar o excesivo desenvolvemento da vexetación. Nestes casos debe realizarse a poda en verde e o esfollado lixeiro, así como proceder á roza da cuberta vexetal, para poder levar a cabo un mellor control de enfermidades.
Patacas e outras hortícolas
As condicións de humidade elevada e o sol destes días provocarán unha evaporación da auga do solo que xerarán condicións moi favorables ao mildio na pataca e outras hortícolas. Deste xeito, o centro dependente da Deputación recomenda, naquelas plantacións que non estean protexidas, aplicar un tratamento que respecte o prazo de seguridade dos produtos nas plantas temperás próximas á colleita.
