O Concello de Baiona e a Biblioteca Municipal entregaron o libro de relatos “O enxeño engaiolado”, que reúne os relatos das tres últimas edicións.
O acto celebrouse onte venres, ás 17.30 h, no Salón de Plenos do Concello de Baiona. O libro recopila os relatos gañadores dos Certames de Relato Curto e Conto Infantil “O enxeño engaiolado” nas súas tres primeiras edicións 2020-2022.
O certame que nacera dunha iniciativa para incentivar, desde o confinamento, a creatividade literaria e celebrar o Día do Libro 2020 conta dende onte cun libro que formará parte da Biblioteca Municipal. Cun deseño innovador, está creado con frescura e elegancia en soporte de gran formato, 22×22 cm para a fácil lectura. Ademais conta con ilustracións ao principio de cada relato da pintora Laine Villero e deseño da portada mantendo a idea orixinal dunha gaiola pero aberta como símbolo de liberación do “Enxeño engaiolado”.
O fundador de Xerais, presente no acto, Xulián Moure, agradeceu a iniciativa do Concello de Baiona toda vez que este acto promove a cultura do Val de Miñor.
O rexidor municipal, Carlos Gómez, expresou a súa satisfacción polo certame e o “agradecemento a todos os participantes pola súa participación e o desexo de que dentro de outros tres anos poidamos voltar a reunirnos para festexar o segundo volume”.
Os actos concluiron co festival de poesía do colexio Cova Terreña de Baiona e a homenaxe aos grandes escritores Helena Villar Janeiro e Xesús Rábade Paredes.
