O vindeiro martes, 7 de novembro ás 17:30 h, haberá unha actividade especial no salón de actos do colexio de Porto Cabeiro. Trátase da presentación do libro “O alumnado de Porto Cabeiro escribe sobre as súas parroquias”. Un libro editado polo Concello de Redondela e preparado dende o SNL coa colaboración do equipo de normalización do citado centro.
O libro reproduce traballos que o alumnado fixo ao longo de moitos anos sobre toponimia local, lendas e costumes da zona, patrimonio da parroquia etc. Unha colección de traballos que acollen unha descrición do patrimonio material e inmaterial de Vilar de Infesta e Cabeiro. A escolma pretendeu ser o máis representativa posible dando entrada a todo tipo de manifestacións culturais como son o entroido ou os oficios tradicionais.
O acto está aberto á participación do público pero, en especial, á comunidade educativa e familias das parroquias de Vilar e Cabeiro. Os libros pódense levar de agasallo.
No acto participarán a directora do centro Sonia Montenegro, a mestra Susana Crespo, o responsable do SNL Xurxo Martínez González e a alcaldesa Digna Rivas.
