O PSdeG de Redondela denuncia os plans da Xunta de Galicia de reestruturar a FP e súmase ao Grupo Parlamentario dos Socialistas de Galicia – que por iniciativa das súas deputadas, entre as que se atopa Leticia Gallego Sanromán- presentan a seguinte proposición non de lei en Comisión 4.ª, Educación e Cultura: O Parlamento galego insta a Xunta de Galicia a continuar no IES de Chapela en Redondela cos ciclos superiores de Dietética e Educación Infantil do réxime de persoas adultas en modalidade presencial no curso 2023-2024.
A secretaria Xeral do PSdeG de Redondela e alcaldesa de Redondela, Digna Rivas, expón que “os profesores e profesoras do IES de Chapela alzaron a voz xunto cos docentes de toda a comunidade en protesta pola reestructuración do FP, non porque haxa máis oferta, obviamente, senón porque moitos dos cursos presenciais están a ser trasladados á modalidade a distancia. A comunidade educativa e os sindicatos denuncian esta transformación porque se fai de forma unilateral, sen negociación previa e sen ter en conta a opinión dos centros afectados”.
Con esta reestruturación da FP por parte da Consellería de Educación no IES de Chapela en Redondela modificarase a oferta de ciclos de FP para o próximo curso 2023-2024. A nova oferta suprime os ciclos superiores de Dietética e Educación Infantil do réxime de persoas adultas en modalidade presencial para implantalos a distancia, impedindo que o alumnado matriculado nese curso poda continuar os seus estudos de forma presencial. Diante do aumento da demanda é necesario aumentar as ofertas con novos ciclos.
A Directora xeral de Formación Profesional en Galicia, Eugenia Pérez, afirmou, fronte ás queixas do alumnado, que os centros ante a nova situación “poden decidir establecer unha presencialidade do 100% nos cursos a distancia se así o requiren as necesidades do alumnado”. Sen embargo, segundo a xefa de estudos do IES Chapela, Fátima Ferreiro, a realidade é que isto non é posible porque os ciclos a distancia están regulados para basearse na autoaprendizaxe a través da plataforma e non nas clases presenciais. Ademais, a asistencia ás titorías é voluntaria para o alumnado, o que ten como consecuencia que non se poden realizar nelas actividades avaliables nin que supoñan unha vantaxe para o alumnado que asista ás mesmas respecto daquel que non o fai. Por outra banda, a ratio de alumnado por grupo nos ciclos presenciais é de 30 persoas, mentres que nos ciclos a distancia é de 50 ou máis”. Con todos estes datos, dende o IES Chapela denuncian que “resulta imposible garantir a impartición de clases presenciais a 50 ou máis alumnos e alumnas por cada docente, xa que nos centros educativos non dispoñemos de aulas e dotacións materiais que permitan impartir clases presenciais a 50 ou máis alumnos e alumnas ao mesmo tempo”.
Digna Rivas recalca que “esta medida non fai máis que agochar un intento de facer desaparecer a modalidade presencial dos centros públicos cun claro afán aforrativo inaceptable e que suporá un detrimento importante da calidade da FP. Eliminar a presenza nas aulas implica que alumnado dende os 15 anos en diante, na súa maioría mozas por tratarse de ciclos altamente feminizados, se vexa na obriga de estudar en centros privados ou na modalidade á distancia, abocándoos ao illamento social. As altas taxas de abandono que se producen no ensino a distancia, o son por algún motivo, e afectarán ás posibilidades de emprego de quen hoxe fai un ciclo de forma presencial”.
O obxectivo da Xunta de Galicia non é mellorar calidade educativa, senon simplemente recortar profesorado. Por todo o exposto, o Grupo Parlamentario dos Socialistas de Galicia presenta a seguinte proposición non de lei en Comisión: O Parlamento galego insta a Xunta de Galicia a continuar no IES de Chapela en Redondela cos ciclos superiores de Dietética e Educación Infantil do réxime de persoas adultas en modalidade presencial no curso 2023-2024.
