32.5 C
Pontevedra
Luns, 22 de Xullo de 2024
Máis
    HomeO CondadoPonteareasO Concello pon a disposición das familias de Ponteareas o campamento Concilia-Tea...

    O Concello pon a disposición das familias de Ponteareas o campamento Concilia-Tea Nadal

    O Concello de Ponteareas anuncia a chegada de Concilia-Tea Nadal, un programa deseñado para ofrecer ás familias un espazo divertido e educativo para os máis pequenos durante as vacacións do Nadal.

    Este campamento, dirixido a nenas e nenos de 3 a 12 anos escolarizados nas etapas de Educación Infantil e Educación Primaria, busca promover a conciliación familiar coa laboral ao mesmo tempo que fomenta a aprendizaxe, a creatividade e a diversión.

    A actividade desenvolverase nas instalacións do CEIP Nosa Señora dos Remedios de Ponteareas, situado na rúa Fermín Bouza Brey, 13, durante os días laborais comprendidos entre o 22 de decembro e o 5 de xaneiro, ambos incluídos, en horario de 9:00 a 14:00 horas. O custe é de 50 euros por participante. Ademais, ofrécese un servizo de aula matinal desde as 8:00 ata as 9:00 horas por 10 euros adicionais. É importante mencionar que é preciso un mínimo de 25 inscritos para realizar a actividade principal e 10 para o servizo de aula matinal.

    A preinscrición estará aberta desde mañá, 30 de novembro, ata o vindeiro xoves, 7 de decembro e as bases e o impreso poderán obterse na Oficina de Ensino, na segunda planta do concello, de luns a venres, en horario de 9 a 14 horas, no Rexistro Xeral do Concello de Ponteareas ou na páxina web ponteareas.gal. A documentación requerida deberá presentarse no Rexistro xeral do Concello de Ponteareas, en horario de 9 a 14 horas ou ben mediante a sede electrónica municipal, previa identificación electrónica: https://ponteareas.sedelectronica.gal.

    O xoves 7 de decembro publicarase unha listaxe provisional de admitidos/as nos taboleiros do Concello e tamén na páxina web. A listaxe definitiva estará dispoñible o 13 de decembro nos mesmos lugares. A información completa está publicada nas bases da convocatoria.

    En caso de superar a demanda das prazas dispoñibles, iranse cubrindo por estrita orde de presentación no rexistro do Concello de Ponteareas, dando prioridade aos menores empadroados en Ponteareas. Unha vez confirmada a praza, requirirase a presentación da documentación necesaria nun prazo máximo de 48 horas.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.