Tomiño prepárase para o seu ‘Nadal voluntario, Nadal solidario’. En colaboración co Centro de Día e coas residencias da terceira idade, o grupo de voluntariado da OMIX do Concello vén de poñer en marcha unha campaña especial para levar o espírito do nadal aos corazóns das persoas maiores do municipio. “Queremos encher de sorrisos estas festas, especialmente para as nosas avoas e avós, persoas que tanta importancia teñen para todas e todos nós”, salienta a alcaldesa, Sandra González.
Para levala a cabo, búscanse veciños e veciñas voluntarias que preparen agasallos feitos preferiblemente a man xunto cunha nota manuscrita personalizada que se farán chegar a cada unha das persoas usuarias destes centros tomiñeses, pequenas expresións de agarimo e calidez nun momento do ano tan especial.
As persoas interesadas en participar nesta iniciativa poden inscribirse xa a través da web municipal. Unha vez realizada a inscrición, o Concello contactará con todos os voluntarios e voluntarias participantes para darlle información máis detallada da persoa maior asignada.
