O goberno de Nigrán levará ao pleno ordinario deste mércores 26 de xullo o inicio do expediente de contratación do futuro servizo de recollida de lixo e limpeza viaria. Tras case tres anos prorrogado a Cespa-Precero, os novos plegos pasarán dunha concesión de 16 anos por 26 millóns de euros a unha adxudicación de servizo con valor máximo de 32,9 millóns de euros e 10 anos de duración sen dereito a prórroga. Este será o contrato con maior dotación económica na Historia do Concello de Nigrán e o obxectivo da multiplicación orzamentaria non é outro que a renovación absoluta da calidade da prestación.
“Elaboramos uns plegos transparentes e innovadores que implicarán unha mellora radical no servizo prestado, incluíndo brigadas exclusivas de limpeza viaria, selección de orgánica ou o sistema electrónico de recollida intelixente “, explica o alcalde, Juan González, quen xustifica o tempo de demora do inicio de expediente na elaboración “absolutamente minuciosa das bases”. “Este non é un contrato que se elabora nuns meses, optamos por darlle unha volta por completo ao anterior transformando todos os conceptos; a diferencia é que este é un contrato innovador e moi aberto que non quedará obsoleto en 4 anos porque ten visión de futuro, a esixencia á empresa é moi alta pero tamén lle outorgamos libertade para que cumpra do xeito que ela crea convinte coa calidade que se lle pide, xa non é unha subasta dun servizo, vai máis alá diso”, explica o rexedor, quen engade que na adxudicación puntuará un 55% a mellor oferta económica e un 45% a mellor proposta técnica, estimándose que o concurso quede resolto a inicios de ano.
A cidadanía notará o cambio desde o mesmo momento en que se estree a concesión porque se estipula que a empresa realice un investimento inicial de 3´4 millóns de euros para aumentar nun 20% o número de contedores e renovalos todos, ademáis de incorporar a recollida orgánica para a hostalaría (irá extendéndose progresivamente a toda a veciñanza) e dispor obrigatoriamente dunha flota de vehículos e maquinaria totalmente nova. Ademais, o plego beneficiará aos residentes dos diferentes SAUs ou a Porto do Molle, zonas que non figuran a día de hoxe por ser posteriores ao ano 2004 e que non tiñan cabida coa concesión actual (entrou en vigor nese ano). “O vindeiro contrato ten visión de futuro no seu plantexamento, cubrirá todo o territorio independentemente do desenvolvemento urbanístico que experimente Nigrán nos próximos 10 anos”, subliña González.
A veciñanza tamén notará a mellora na calidade do servizo grazas á creación por vez primeira de dúas brigadas adicadas en exclusiva á limpeza urbana (viaria, de marquesinas ou pavimentos) cun máximo 22.000 horas ao ano e outra rural para a recollida de podas, desbroces, etc. “Son todos aqueles traballos que se saen da rutina diaria da concesionaria e que agora estarán sempre atendidos”, explica González, quen incide en que “o control de calidade por parte do Concello será rigoroso”. “Este plego non impón as técnicas ou métodos de limpeza que ten que usar a empresa, o foco de atención e de sancións será non cumprir coa calidade que se lle esixe, damos liberdade a cambio de que asuman a responsabilidade pactada. Esas 22.000 horas de limpeza viaria poden distribuílas no ano como eles estimen, asi que xa non hai excusa cando chegue o verán e se multiplique a poboación: eles teñen unha carteira de horas máis que suficiente para cumprir escrupulosamente”. Neste sentido, o contrato contempla un reforzo en calquera evento multitudinario que se requira e un aumento do punto limpo móbil, ademais, atendendo aos efectos do cambio climático no uso dos areais, amplíase a tempada de limpeza de praias do 15 de Xuño ao 30 de Setembro (actualmente é só ata o 15 de setembro).
Os traballadores da futura adxudicataria tamén verán melloradas as súas condicións ao establecer o propio plego revisións salariais anuais obrigatorias, ademais de establecerse un aumento do persoal. O seu labor será tamén máis eficiente grazas a estar todos os contedores dotados con dispositivos electrónicos que informarán da súa capacidade en tempo real, permitindo mellorar a eficacia da recollida. “Este sistema intelixente fará que en canto se suban ao camión teñan a súa disposición as rutas que teñen que tomar ese día atendendo a capacidade en que se atopan os contedores”, finaliza.
