18.2 C
Pontevedra
Luns, 17 de Xuño de 2024
Máis
    HomeVal MiñorNigránNigrán abre o parking de A Ramallosa

    Nigrán abre o parking de A Ramallosa

    O Concello de Nigrán abrirá hoxe, véspera de Reis, o parking de A Ramallosa despois de 5 anos totalmente pechado. O consistorio asume a súa xestión directa tras conseguir o goberno local remunicipalizar unha infraestrutura que pertencía á concesionaria ‘Estacionamientos Valle Miñor, S.L.’, empresa liquidada e disolta no 2019. O estado de deterioro desta instalación demorou máis de previsto a súa apertura ao ser preciso realizar investimentos por valor de máis de 120.000 € para cumprir con todas as normativas vixentes e para dotalo de dúas tomas para vehículos eléctricos.

    “Gustaríanos ter aberto antes pero, finalmente, tivemos que facer máis arranxos dos previstos para cumprir con todos os criterios de seguridade. O beneficio para o comercio local da Ramallosa e para os usuarios da piscina mancomunada situada ao seu carón é incalculable”, refire o alcalde, Juan González.

    Así, estas primeiras semanas, e de xeito experimental a modo de proba, será totalmente gratuíto, permanecendo aberto de 8:00 a 22:00 horas de luns a sábado. Posteriormente rexirase polos prezos públicos xa aprobados, que comprenden as 2 primeiras horas gratis (estes usuarios nin siquera terán que validar o tíquet) e a partir de ahí 0,02 €/minuto ata un máximo diario de 14,40 €. A maiores, o goberno local contempla liberar 90 prazas para os comerciantes deste núcleo urbano, xestión que se fará a través de a asociación de empresarios Ovalmi. Igualmente, co obxectivo do goberno local de fomentar a compra de vehículos eléctricos, a súa carga será gratuíta.

    A posta a punto do parking supuxo para o Concello un investimento de máis de 120.000 € nos traballos de certificación da instalación eléctrica e de seguridade, reposición da maquinaria, axuste da protección contra incendios, instalación de dúas bombas de achique para evitar inundacións na última planta, a propia limpeza de toda a superficie ou a posta dos dous cargadores. Igualmente, o Concello negociou coas distintas partes implicadas e non ten que asumir ningunha débeda ou indemnización á empresa concesionaria. 

    O goberno local non considerou en ningún momento outra opción que a xestión pública para que de verdade a súa apertura beneficie económica e socialmente a todo este núcleo. “Unha concesionaria lóxicamente busca facer negocio porque é unha empresa, en cambio, desde o Concello o que buscamos é un beneficio social, non o lucro: aparcamento gratuíto para toda aquela persoa que veña a Ramallosa”, engade o rexedor.

    O parking, aberto no 2007 coa concesión a 39 anos para ‘Estacionamientos Valle Miñor, S.L.’, foi pechado pola empresa o 1 de xaneiro de 2017,  sendo liquidada a adxudicataria xudicialmente a mediados de 2019. A tramitación de cara a súa re-municipalización, moi complexa, foi asumida directamente polo edil de Mobilidade Diego García, quen estivo a fronte da actualización de todo o recinto para que cumpla con todos os requerimentos precisos de seguridade.

    Este aparcamento súmase ao leira-parking municipal do núcleo urbano de Nigrán, tamén 100% público e gratuíto e polo que o Concello paga un aluguer de 6.137 € ao ano, e a outra leira no Bulevar de Praia América de 4.000 metros cadrados cecida gratuítamente polos propietarios e con capacidade para máis de 200 coches.

    “Somos conscientes do importante que son para os núcleos urbanos as bolsas de aparcamento porque repercuten directamente no pequeno comercio e na propia calidade de vida das persoas, polo que consideramos a re-apertura deste parking da Ramallosa de xeito 100% público un dos grandes logros deste goberno”, resume González.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.