8.5 C
Pontevedra
Venres, 29 de Marzo de 2024
Máis
    HomeVal MiñorGondomarGondomar presenta a programación cultural de outono

    Gondomar presenta a programación cultural de outono

    A programación “Gondocultura Outono” foi presentada nun acto ao que asistiron o alcalde do municipio, Paco Ferreira, e o director xeral de AGADIC, Jacobo Sutil, así como o concelleiro de Cultura Juan Bas. Un acto no que unha vez máis quixeron aproveitar a ocasión para subliñar a importancia do papel da cultura na sociedade, e a súa achega ao PIB da comunidade, así como a colaboración das administración no seu apoio.

    Neste sentido o alcalde, Paco Ferreira, lembrou o compromiso do seu goberno con esta actividade profesional “como demostra o amplo programa desenvolto este verán, no que gozamos de estreas a nivel autonómico e da primeira edición do Festival de Danza Corpo a Terra, que nos elixiu como sede para as súas próximas citas”.

    “O outono chega cun gran programa que nada ten que envexar ao deste verán, porque unha vez máis, o noso concelleiro de Cultura Juan Bas, implicouse en apostar pola cultura galega, e nos permitirá gozar de ata 15 opcións diferentes, moitas delas con premios María Casares no seu haber ou candidaturas ao Goya”, sinalou o alcalde.

    Pola súa banda, Jacobo Sutil, destacou a importancia da colaboración entre administracións para apoiar a un sector que “estivo e está a pasar un momento complicado tras a pandemia”. Agradeceu o esforzo realizado polos concellos e a súa colaboración “coa que logramos desenvolver máis de 500 funcións en toda Galicia”.

    Teatro, danza, música e cinema

    Entre o 1 de outubro e o 05 de decembro todas as fins de semana en Gondomar terán unha cita con algunha das actividades programadas en “Gondooutono”, inaugurando a nova tempada de teatro a compañía Limiar Teatro e a estrea absoluta en Gondomar da súa obra “A música non amansa as Bestas”, espectáculo realizado en coprodución con residencia artística no concello de Gondomar.

    Sumaranse a esta estrea a representación da recentemente premiada con 4 premios María Casares “A lingua das Bolboretas” da man de Sarabela Teatro que tamén representará o clásico “Memorias dun neno labrego”. O programa complétase con “Golfo” da compañía Señora Supina coprodución con residencia artística no concello de Gondomar; “Soga e Cinsa” de Aporía Escénica; e “Vals para Cincinati” da man de Teatro do Ar. Non faltarán a cita os espectáculos pensados para as familias como son “Animal Sagrado”, “Cartoons” e “Bambolina”.

    Este ano, por primeira vez, inclúese no programa un ciclo de cinema galego, en colaboración coa asociación Alice Guy Val Miñor, no que se proxectarán catro títulos todos eles de creadores/as da nosa comunidade: “9 Fugas” con dous premios Mestre Mateo e premiada como mellor película do Festival de Xixón; “A viaxe de Leslie”, con 6 candidaturas aos premios Goya, entre eles o de mellor película documental, “Doghs” e “Manoliño Nguenma”.

    Por último, o programa tamén inclúe a presenza da música lírica coa representación da Boheme da man de Camerata Lírica, e o espectáculo de danza “Bailar Agora” que chega a Gondomar con 3 premios María Casares – actriz protagonista, e dirección e iluminación- no seu haber.

    Compra de entradas

    A programación desenvolverase entre o 01 e o 5 de decembro no Auditorio Municipal Lois Tobío e o prezo das entradas oscilará entre os 2,5 e os 3,5 euros, dependendo do espectáculo. As entradas de calquera deles poderán adquirirse no despacho electrónico https://taquilla.concellodegondomar.gal ata completar aforo permitido pola normativa sanitaria vixente nese momento. Ademais, será obrigatorio o uso de máscara no interior e deberán manterse sentados no lugar asignado.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.