Despois de máis dun ano buscando historias que vexan a luz, o grupo de teatro comunitario A Comuna súbese por primeira vez a un escenario para estrear ‘Cando o río sona’, unha representación no que o elenco escenificará sucesos ocorridos en Ponteareas e as súas 24 parroquias e explorará curiosidades que seguro van facer ao público coñecer a vila dende outro punto de vista.
A actuación será este sábado 17 de xuño ás 20.30 horas no auditorio municipal Reveriano Soutullo con entrada de balde. Nela as e os espectadores poderán gozar dun tipo de teatro pensado por e para a veciñanza que nace na década dos 80 do século pasado na Arxentina e que dende entón marca as súas diferenzas con outros tipos de teatro polas súas peculiaridades.
O teatro comunitario é unha práctica de índole social na que se pon en valor a recollida de historias da contorna, facendo que a práctica incremente os valores de vivencia colectiva, compartindo co público reflexións e debate ao final nunha conversa colectiva tras a función.
