Un ano máis, o Concello de Mondariz organiza un Campaverán para favorecer a conciliación laboral, familiar ou persoal das familias en período non lectivo e ofrecer unha alternativa de lecer e tempo libre que axude a fomentar o desenvolvemento integral das participantes a través da educación en valores dunha maneira lúdica. O prazo de solicitude de praza comeza este luns 8 de maio e exténdese até o xoves 25 de maio –ambos días incluídos–, sen posibilidade de ampliación. As bases e a ficha de inscrición xa están dispoñibles para descarga pública na Sede Electrónica do Concello de Mondariz (https://mondariz.sedelectronica.gal).
Esta actividade está dirixida a nenos e nenas de 3 a 12 anos de idade, preferentemente empadroados/as no Concello de Mondariz. Consta de 50 prazas e está programada para os meses de xullo e agosto, en horario regular de 9:00-14:00 horas (de luns a venres, agás festivos), aínda que existe a posibilidade de amplialo a 8:30-14:30 horas mediante un servizo de garda se hai un número mínimo de participantes que o demandan. Terá lugar nas instalacións da Escola Municipal de Música de Mondariz (Pé de Muíño s/n, parroquia de Riofrío).
Os proxenitores ou titores deberán demostrar que precisan conciliación laboral, familiar ou persoal por estar traballando, ter persoas dependentes ao seu cargo, realizar cursos de formación ou atoparse en situación de especial vulnerabilidade. Poderase solicitar a participación por períodos de 15 días, un mes ou dous meses (tempo completo). Os prezos públicos da actividade, detallados nas bases, van desde os 55 euros por quincena até os 150 euros por campamento completo. Tamén existen descontos por inscrición de irmáns/irmás e condición de familia numerosa.
As solicitudes, acompañadas da documentación requerida que aparece nas bases, deberán presentarse por Rexistro durante o prazo establecido, tanto presencialmente na Casa do Concello en horario de atención ao público (9:00-15:00 horas) como a través da Sede Electrónica do Concello de Mondariz, empregando o certificado electrónico. O martes 30 de maio publicaranse na Sede Electrónica do Concello de Mondariz as solicitudes admitidas, excluídas e as incluídas na listaxe de agarda. A aceptación da praza será confirmada mediante o pagamento do prezo público entre os días 31 de maio e 5 de xuño. Nas propias bases do Campaverán 2023 figura o número de conta no que se debe efectuar o pagamento. Será responsabilidade das familias solicitantes estar pendentes dos prazos de confirmación e pagamento para asegurar a súa participación nesta actividade.
