O Ciclo de Teatro da Deputación de Pontevedra “Tornar ás táboas” chega este venres 8 de decembro ata As Neves. O Auditorio Municipal será o escenario de “A louca historia de Galicia” que interpretará Fulano, Mengano e Citano a partir das 18:00 horas para público mozo e adulto. A entrada é libre ata completar aforo.
“A louca historia de Galicia” é un percorrido, en clave de humor, a través da historia de Galicia percorrendo “apaixonantes períodos de luz e sombras”, que, como destaca a compañía, “fixeron de nós o que somos, ou o que algúns pensan que somos”. “Unha historia –engaden- que demostra que os galegos sabemos rirnos de nós mesmos, e dos outros…”, e que sigue medrando e enriquecéndose cada ano.
Co ciclo teatral “Tornar ás Táboas” a Deputación de Pontevedra está a achegar, dende outubro e ata finais de mes, un total de 49 funcións gratuítas e dirixidas a todos os públicos a outros tantos concellos da provincia de menos de 20.000 habitantes. Participan neste programa provincial trinta compañías de teatro galegas que están a ofrecer por toda a xeografía de Pontevedra unha ampla variedade de espectáculos.
