24.5 C
Pontevedra
Venres, 19 de Xullo de 2024
Máis
    HomeLouriñaSalceda de CaselasConcello e Confederación Hidrográfica Miño-Sil camiñarán da man na consecución do saneamento...

    Concello e Confederación Hidrográfica Miño-Sil camiñarán da man na consecución do saneamento para Entenza e Soutelo

    A alcaldesa de Salceda, Loli Castiñeira, acompañada do concelleiro de Axenda Ecolóxica, Marcos Troncoso, e o arquitecto municipal, Rubén Martín, reuníronse esta semana co presidente da Confederación Hidrográfica Miño-Sil, Jose Antonio Quiroga, para trasladarlle diferentes cuestións do municipio afectadas polo organismo estatal.

    O presidente da Confederación comprometeuse a estudiar as posibilidades de investir no saneamento das parroquias de Entenza e Soutelo unha vez se estableza a partida orzamentaria nos orzamentos xerais do Estado, establecendo este tipo de investimentos como prioritarios. O Concello traballa xa na actualización dos proxectos de saneamento existentes para estas dúas parroquias para facelos chegar canto antes.

    Na reunión trasladouse tamén a preocupación polo estado da Ponte do Picado, na parroquia de Entenza, que presenta deficiencias que fixeron que por parte dos Concellos de Salceda e Salvaterra se pechase xa o tráfico na estrada que transcorre sobre a ponte para evitar posibles perigos. O Presidente de Confederación comprometeuse a colaborar coa elaboración dun informe de estado que sirva de base para a obra de reparación que haxa que acometer.

    Por último, Jose Antonio Quiroga comprometeuse a revisar e acelerar aqueles permisos solicitados dende o Concello para diferentes obras que requiren autorización sectorial por parte de Confederación Hidrográfica e sen os cales non se pode continuar coa tramitación das diferentes actuacións.

    Marcos Troncoso, concelleiro de Axenda Ecolóxica, agradeceu a boa predisposición do Presidente e a súa celeridade por atender a solicitude de reunión feita dende o Concello e a alcaldesa de Salceda, Loli Castiñeira, indicou que como “xa se ten demostrado, a colaboración entre administracións é fundamental, e en moitas ocasións é o único xeito de sacar proxectos de peso adiante. Pola nosa banda non imos deixar de reunirnos, xestionar e traballar con quen sexa preciso, agradecendo a atención prestada neste caso polo Presidente da Confederación Hidrográfica Miño-Sil”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.