A alcaldesa de Mos, Nidia Arévalo, a concelleira de Cultura e Turismo, Sara Cebreiro, xunto cos demais membros do goberno local, presentaron no Pazo de Mos a Festa Pre Fin de Ano que se celebrará o vindeiro 30 de decembro nesa mesma ubicación.
Rexedora local e edil de Cultura informaron de que a celebración, que terá entrada totalmente gratuíta para o público asistente, contará co popular humorista e youtuber, Jorge Cremades.
Entre os participantes na festa repartiranse miles de uvas coas que acompañar as badaladas de medianoite.
Esta gran celebración de despedida do ano en Mos, que conta co apoio da Xunta de Galicia e o Xacobeo, dará comezo ás 23:00 horas e incluirá as actuacións da Orquestra Kubo e os DJs Enter e Matrek.
Jorge Cremades
Jorge Cremades (Alacante, 1988) leva desde xullo de 2013 facendo virais os seus vídeos de humor en internet con millóns de reproducións continuas.
É un auténtico fenómeno viral con centos de miles de seguidores en Instagram e millóns en Facebook, onde algúns dos seus sketchs superan os 60 millóns de reproducións.
Nos seus vídeos retrata ao ser humano no esplendor da súa cotidianeidade e, sobre todo, escenifica as relacións interpersoais a base de estereotipos, tópicos e situacións comúns.