Aproveitando o descanso lectivo do verán, o Concello de Tui ten acometido nas últimas semanas obras de reparación, mantemento ou mellora e todos os centros escolares públicos do municipio, obras que van dende o pintado de aulas ou paredes exteriores ata a posta en marcha dun novo comedor escolar como foi o caso do CEIP de Guillarei.
Precisamente a construción do comedor no colexio Guillarei, cun investimento superior aos 15 mil euros, foi o maior investimento realizado. Deste xeito todos os colexios públicos de Primaria do Concello de Tui contarán neste novo curso escolar con comedor, un servizo imprescindible para facilitar a conciliación.
Esta foi unha das actuacións máis importantes acometidas antes do inicio deste curso. Amais no CEIP Nº 2, o centro que conta co maior número alumnado de todos os colexios tudenses, leváronse a cabo obras de pintado, albanelería e fontanería, ao igual que nos colexios de Randufe e Pazos de Reis. Mentres no CEIP de Rebordáns executáronse as obras necesarias para dividir unha aula en dúas con aseo para o alumnado de infantil. A posta a punto do salva-escaleiras e reparacións de mantemento foron as actuacións levadas a cabo no CEIP nº1 .
En todos os colexios, incluídas as aulas do CRA Mestra Clara Torres, puxéronse a punto todos os patios exteriores e restauráronse todos os elementos de xogos infantís.
Amais destas obras de mantemento no centros de ensino de Infantil e Primaria o Concello de Tui tamén acometeu obras de mantemento e reparación no Conservatorio de Música Municipal.
A concelleira de Ensino, Cultura e Mocidade, Sonsoles Vicente, explica que todas estas obras acometéronse con fondos propios, o que demostra o compromiso do equipo de Goberno cun ensino público de calidade, procurando ter nas mellores condicións posibles os centros escolares”.