A Deputación de Pontevedra organiza esta fin de semana 19 saídas no marco do programa provincial “En Ruta coa Depo”, unha iniciativa que ofrece aos colectivos sociais da provincia a posibilidade de pasar un día de convivencia, ocio e tempo libre en lugares emblemáticos do territorio provincial. Entidades dos concellos de Agolada, Baiona, Bueu, Cangas, A Estrada, Lalín, A Lama, Marín, Moaña, Ponteareas, Redondela, O Rosal, Silleda, Soutomaior e Vigo mobilizarán un total de 967 persoas para coñecer lugares da provincia como a illa da Toxa, O Grove, a ría de Arousa, a Illa de Ons, as Illas Cíes, o barrio mariñeiro do Berbés en Vigo, a Illa de San Simón ou a illa de Tambo.
O sábado 2 de setembro nove entidades da provincia participarán no programa da Deputación “En Ruta coa Depo”. Cara a Illa de Ons e Portonovo sairán a Asociación de Veciños de San Vicente e Canedo de Ponteareas, A Asociación Cultural Xeración Nós Borraxeiros de Agolada e a ANPA Covaterreña de Baiona. A Asociación Veciñal Deportiva e Cultural a Miñoteira de Redondela visitará a Illa da Toxa e o Museo da Sala do Grove. A Asociación de veciños de Alxán de Soutomaior e a ANPA os Muíños do Colexio de Educación Infantil e Primaria Alexandre Bóveda farán o percorrido polas Illas Cíes e o barrio mariñeiro do Berbés en Vigo. A ruta de cultura mariñeira polo mosteiro de Poio, a Illa de Tambo e Combarro será realizada pola Asociación de Veciños As Fontes de Lavadores de Vigo e a Asociación Mulleres en Igualdade do Rosal. Por último, a Asociación de Viticultores San Martín de Bueu percorrerá a Illa de San Simón, o castelo de Soutomaior e Ponte Sampaio e o Museo Meirande de Redondela.
O domingo 3 son dez as entidades que participarán no programa. A Asociación de Mulleres en Igualdade de Vigo, a Asociación Cultural Amigos da Vieira de Bueu e a Asociación de Mulleres de Seixido da Lama percorrerán a Ría de Arousa. Ata as Illas Cíes desprazaranse a Asociación Cultural Charaviscas de Domaio e a Asociación Cultural Museo do Mar de Marín. O Comité para a Xestión de Proxectos Europeos do Municipio de Silleda e a Asociación de Mulleres Rurais San Miguel de Cora visitarán a Illa de Ons e a localidade mariñeira de Portonovo. A Asociación de Mulleres Escola Vella do Hío de Cangas e a Asociación Mulleres de Soutolongo de Lalín visitarán a Illa de Tambo, Combarro e o mosteiro de Poio. Finalmente, a Asociación cultural San Nicolás de Prado de Ponteareas percorrerá o Museo Meirande de Redondela, o castelo de Soutomaior e Ponte Sampaio e a Illa de San Simón. A través de “En Ruta coa Depo”, a Deputación de Pontevedra fomenta a participación, a convivencia e a cohesión social dos colectivos sociais da provincia a través de 33 rutas temáticas nas que, en total, este ano participarán preto de 20.300 persoas e case 400 asociacións da provincia. Todas as prazas do programa, que conta cun orzamento próximo aos 480.000 euros, están subvencionadas pola institución provincial. Delas, 300 prazas son financiadas ao 100 % co obxectivo de achegar o programa ás persoas con dificultades económicas ou en risco de exclusión social.
