16.1 C
Pontevedra
Luns, 15 de Xullo de 2024
Máis
    HomeÉ NoticiaO Sergas fai un chamamento á poboación para vacinarse fronte á...

    O Sergas fai un chamamento á poboación para vacinarse fronte á gripe e a Covid

    A Consellería de Sanidade fai un chamamento a cidadanía para que se vacine da gripe e do covid antes de que remate o ano. Desde o luns, 11 de decembro, o departamento sanitario galego continuará inmunizando á cidadanía galega nos hospitais e centros de saúde.

    As persoas de 80 e máis anos, como ata o de agora, poden acudir previa cita ao seu centro de saúde de cabeceira para recibir a vacina de covid e gripe.

    Se o prefiren poden acudir a vacinarse nos hospitais, como terán que facer o resto das persoas menores de 80 anos que teñen indicada a vacinación de covid e gripe. Para iso,  deben coller autocita nos días e horas dispoñibles, que se poden consultar no seguinte enderezo:

    https://coronavirus.sergas.es/Contidos/PUNTOS-VACINACION-COVID-GRIPE-2023

    As persoas que só queiran poñer a vacina da gripe, poden acudir ao seu centro de saúde pedindo cita de maneira habitual.

    Gripe en nenos de 6 a 59 meses

    Por outra banda, a fin de semana do 16 e o 17 deste mes ábrense os hospitais para a vacinación da gripe nos nenos e nenas de 6 a 59 meses. Trátase dun novo chamamento para facilitar a conciliación, e que se poida vacinar aos cativos na fin de semana, xa que é posible facelo calquera día da semana nos centros de saúde. A Dirección Xeral de Saúde Pública procederá a facer a convocatoria, de novo, por SMS.

    Vixilancia da gripe e da covid

    Segundo o último informe de vixilancia da gripe que realiza a Dirección Xeral de Saúde Pública da Consellería de Sanidade, a actividade gripal referida á semana epidemiolóxica que rematou o 3 de nadal, mantense nun nivel baixo de intensidade, se ben o número de consultas por gripe está a aumentar respecto da semana anterior. En concreto, a taxa de consultas de atención primaria no conxunto de Galicia medrou un 73% respecto da semana anterior. A suba observouse en todas as provincias, especialmente na de Lugo e Ourense, e en todos os grupos de idade.

    Xunto ao anterior, nesta semana epidemiolóxica notificouse o ingreso de 91 persoas con gripe confirmada, un 40% máis que a semana previa, sendo a taxa máis elevada a observada no grupo de 65 e máis anos de idade, seguido do de 0 a 4 anos. No que vai de temporada notificáronse 257 ingresos, todos con virus do tipo A, e trece deles ingresaron na UCI.

    Polo que atinxe á covid, mantense o número de casos constante dos dous últimos meses. A data de hoxe, 9 persoas permanecen en UCI e 107 están en unidades de hospitalización.

    Respecto do virus respiratorio sincitial, Sanidade informa que é o que presenta na actualidade o maior número de casos, atopándonos agora arriba da onda.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.