O alcalde de Nigrán, Juan González, mantivo onte un encontro a tres bandas no Concello co presidente da Federación Galega de Baloncesto, Julio Bernárdez; a vicepresidenta e secretaria da Federación de Deporte Adaptado, Susana García; e a presidenta do Club Baloncesto Nigrán, Nuria Domínguez. Ao mesmo, asistiron tamén tres concelleiras do goberno local. O obxectivo desta reunión foi o de establecer liñas de colaboración entre todas as partes que permitan que o clube nigranés, con sede no Pavillón Municipal de Panxón e actualmente con 11 equipos federados, siga medrando.
“Somos conscientes de que as instalacións se quedan pequenas e, precisamente, este un dos motivos polos que desde o goberno local esteamos a traballar para poder facer realidade un segundo pavillón deportivo en Porto do Molle que, ao mesmo tempo, dea servizo a centros educativos e outras actividades deportivas”, explicoulles o alcalde, Juan González, quen destaca especialmente o proxecto educativo do Club Baloncesto Nigrán, “cunha especial sensibilidade e atención á diversidade e gran defensor e promotor da igualdade de xénero”.
Este clube, nacido no ano 1988, vivíu un parón de anos para reaparecer na escea deportiva nigranesa hai unha década con dous equipos que hoxe en día xa suman 11 desde Baby a Senior Masculino, o que representa 150 baloncestistas federados (ao marxe das crianzas que acuden a actividades extraescolares impartidas nos diferentes colexios a través do clube).
“Os nenos e nenas que entraron no clube con 7 anos son xa case maiores de idade e precisan de máis espazo para adestrar, esa é a inquedanza que transmitimos hoxe e, coma sempre, obtivemos a absoluta disposición do Concello a solventalo e, a súa vez, ofrecemos a nosa colaboración”, explica Nuria Domínguez, presidenta do Club Baloncesto Nigrán.
