O Rosal continúa revolucionando as mentes da súa veciñanza, tamén dos máis mozos. O salón de exposicións acolle ata o vindeiro 19 de xaneiro a mostra ‘Á violencia de xénero dille non’, unha exposición gráfica ilustrada dirixida especialmente á mocidade coa que axudar a recoñecer, identificar e rexeitar condutas sexistas e nocivas nas súas relacións afectivas.
“Dende o Concello continuamos poñendo en marcha actividades coas que visibilizar e crear conciencia social para seguir loitando contra a violencia de xénero e parécenos que involucrar á mocidade é fundamental, porque son a sociedade do mañá, unha sociedade sen un ápice de machismo que debemos construír sobre piares como a igualdade, a liberdade, a tolerancia ou o respecto”, explica a alcaldesa, Ánxela Fernández Callís.
A exposición forma parte das actividades enmarcadas na Rede de entidades locais contra a violencia de xénero, da que o Rosal forma parte e que foi posta en marcha a través da Consellería de Promoción do Emprego e Igualdade da Xunta de Galicia no marco do Acordo de colaboración asinado coa Federación galega de Municipios de Provincias de Galicia. O obxectivo desta rede é procurar un rexeitamento social e institucional da violencia de xénero, sensibilizando á poboación e buscando a súa implicación e compromiso real na súa loita, fomentando ao tempo modelos alternativos de convivencia baseados no respecto e na igualdade.
