O Concello de Nigrán, a través da Biblioteca Municipal, ofrece este este martes 26 de abril na nova Biblioteca ás 18:00 horas o contacontos de Raquel Queizás ‘O eco das pedras. As lendas que nos fan pobo’ a través do programa de dinamización á lectura “Ler conta Moito”. Está dirixido a crianzas a partir de 5 anos e familias e a duración é de 50 minutos. A entrada é libre ata completar aforo.
En Galicia as pedras están vivas. Nelas agóchanse tesouros, nelas viven as mouras encantadas, as serpes grandes, os mouros, os trasnos, os xigantes. Dentro das covas dormen as nubes do Nubeiro antes de formar fortes treboadas. Sobre as pedras descubrimos misteriosos petróglifos, gravados feitos sobre a pedra ao aire libre, que semellan mensaxes secretas que temos aínda que descrifrar.
As pedras falan, só hai que pararse a escoitalas para poder viaxar ao outro lado, alén. Coñeceremos historias lendarias protagonizadas por mouras e nubeiras, mulleres con poder e decisión.
