O Concello de Nigrán, a través do CIM, ofrece este venres 11 de febreiro ás 19:00 horas no Auditorio Municipal a obra de teatro familiar ‘Ciencia que alimenta’, espectáculo que se encadra na programación especial polo ‘Día Internacional da Muller e a Nena na Ciencia’. A comedia, idea orixinal de Pío González, corre a cargo da compañía ‘Roto e Descosida’, cos actores Carlos Godoy e Cecilia Vázquez respectivamente.
‘Ciencia que alimenta’ é unha representación teatral con contidos científicos e sen comunicación verbal convencional (linguaxe onomatopeica). A obra abrangue unha sucesión de experimentos científicos ou demostracións de algún concepto da ciencia que son realizados por dúas personaxes, un profesor científico (toda unha eminencia) e o seu axudante (burlón, pasota e un chisco toupón). A ciencia require estudo, atención e esforzo, pero a recompensa (o coñecemento), pode ser moi grande para as persoas que se achegan a ela.
Dentro desta programacón, o Concello de Nigrán mantén ata a medianoite deste xoves 10 de febreiro o prazo de inscrición para participar no escape room ‘Estrelas’ do domingo 13 de abril ás 11:00 horas nas inmediacións do Pavillón de Panxón. Toda a información (bases, solicitude e autorización en caso de menores) está a disposición dos interesados na web municipal no apartado de ‘Programación Mes da Muller’.