O Concello de Nigrán ven de emprender un cuarto plan para a mellora das fontes municipais cun investimento de 18.150 € para mellorar oito mananciais das parroquias de San Pedro (Camesella, Souto Pequeno, Viso e Vilariño), Camos (A Lama) e Priegue (Adro da Fonte e Alborés Grande).
Os traballos correron a cargo da empresa de Nigrán Coperva e fundamentalmente consistiron en limpeza, encintado, canalizacións, reparación de colectores e arquetas, saneamento de soleiras e pilares, pintado, mellor nos accesos… Anteriormente, no 2022, o Concello destinou 18.500 € para as fontes de Casanova, Preáns, Pulga e Lodeiro na parroquia de Parada; Pedrosa, Currelo e Medoñas en Priegue; Ouro e Barranco en Nigrán; e, finalmente, Xesteira en San Pedro; igualmente, no mesmo ano, investíronse 100.430 € para rehabilitar o lavadoiro de A Cruz, Suapena e Rial (Camos), Cabaleiro (Parada), Mestra Emérita e Alborés Pequeño (Priegue) e San Xoan (Panxón).
“Forman parte do noso patrimonio etnográfico e están en uso por parte da veciñanza, polo que se trata de conservalas e poñelas en valor, así que iremos chegando a todas mediante diferentes plans”, explica o alcalde, Juan González.