O Concello de Nigrán leva dende onte a súa campaña de promoción do comercio local ‘Agora máis que nunca este Nadal merca en Nigrán’ a 60 escaparates do municipio adheridos a Ovalmi. Así, grazas á colaboración da asociación de empresarios, o Concello contratou o servizo do deseñador gráfico de Sabarís Juan Hernández e o seu irmá Ignacio (ilustrador profesional) para pintar con rotulador branco sobre vidro o hashtag ‘#VivoEnNigránComproEnNigrán’ dun xeito decorativo. O obxectivo é apelar á veciñanza sobre a importancia de consumir no comercio de proximidade ao tempo que se extende esta ‘etiqueta’ en redes sociais (todos os participantes serán subidos ás redes do Concello). O pintado rematará a final desta semana.
“Animamos non só aos comerciantes a que empreguen este hashtag #VivoEnNigránComproEnNigrán, se non á veciñanza para que suba fotos as súas redes consumindo nos negocios locais baixo esta etiqueta, o obxectivo é crear un clima positivo e extender esta idea entre todos”, explica o alcalde, Juan González.
“Estou moi contento de sumarme a esta campaña precisamente na miña comarca”, confesa Juan Hernández, deseñador gráfico de 34 anos natural de Sabarís e titulado en Gráfica Publicitaria en Aula D. Precisamente, Juan ten gran experiencia en lettering, letras artísticas feitas a man, desenvolvendo este traballo para moitas pizarras e cartas de restaurantes do Val Miñor.
Esta campaña inclúe diferentes aspectos, entre os que destaca o sorteo de 1.300 € en vales de 50 € entre os clientes dos establecementos adheridos a Ovalmi para consumir en 26 locais hostaleiros do municipio durante todo o 2021, difusión publicitaria e en redes, regalo de 8.000 bolsas e carteis entre o pequeno comercio ou a estrea o mércores dun vídeo no que os protagonistas son os propios comerciantes de Nigrán (mañá presentarase o trailer en redes). Todo baixo o mesmo lema e coa cara dun Papá Noel sorrinte como ilustración (obra precisamente da deseñadora gráfica de Nigrán Olalla Fernández).
O Concello de Nigrán continúa así co seu esforzo para promover o comercio de proximidade entre a veciñanza, tal e como xa o fixo durante o confinamento coas pequenas tendas de alimentación, as panaderías en Pascua ou o Día da Nai. “Queremos motivar máis que nunca ao consumo local e, a maiores, o Concello inclúe actividades de Nadal que dinamizarán as rúas e, por suposto, mantemos o alumeado porque tamén da vida ao comercio”, resume o alcalde.
