15.8 C
Pontevedra
Xoves, 20 de Xuño de 2024
Máis
    HomeVal MiñorNigránNigrán incluirá ao 'Cine Imperial' da Ramallosa na bonificación du 95% do...

    Nigrán incluirá ao ‘Cine Imperial’ da Ramallosa na bonificación du 95% do IBI ao seren declarado por vez primeira de interese municipal

    O Concello de Nigrán incluirá por vez primeira na bonificación do 95% do Imposto de Bens Inmobles (máxima rebaixa permitida por lei e aprobada polo goberno de Nigrán no 2016) ao Cine Imperial da Ramallosa. O Concello levará ao pleno ordinario do 22 de febreiro a súa declaración como entidade de utilidade municipal xunto coas entidades veciñais e culturais que anualmente o solicitan (Centro Cultural As Angustias, A.V.A Camoesa, A.V. A Unión, O Torreiro de Priegue, Bolos da Carrasca, O Castro de Chandebrito…), o que implica unha rebaixa media no seu recibo anual de preto de 1.300 euros. Esta bonificación cadra nun intre especialmente duro para as entidades e para o propio cine, xa que actualmente manteñen as instalacións pechadas por decreto da Xunta.

    “É unha cantidade moi cuantiosa para o cine e todas as asociacións de Nigrán, xa que con escasos recursos levan adiante un traballo fundamental durante todo o ano de promoción da cultura e das relacións veciñais”, sinala o alcalde, Juan González. “Analizando a realidade das diferentes entidades beneficiarias démonos conta de que o Cine Imperial, aínda que sexa unha empresa, é de especial interese municipal porque se trata dun dos contadísimos cines independentes que sobreviven non só en Galicia, se non en toda España, e desde o Concello consideramos que a súa actividade, sen dúbida, tamén enriquece a vida cultural de Nigrán e de toda a súa comarca, polo que informamos aos propietarios para que  solicitasen a rebaixa e así o fixeron”, refire González.

    Historia do Cine

    O Cine Imperial fundouse o 1 de febreiro de 1948  da man de Latino Salgueiro Espinosa, un xoven enxeñeiro namorado do cinema, e continúa agora da man das súas fillas. Dende ese momento e ata os nosos días, milleiros de títulos pasaron pola súa pantalla e varias xeracións de espectadores polas súas butacas, especializándose nunha programación internacional de altísima calidade. O Imperial viviu tempos de gran demanda no que chegou a ofrecer programas dobres porque ir ao cine era unha actividade de ocio habitual. Igualmente, mentres a partir dos anos oitenta a meirande parte das salas de todo o país foron pechando, o Imperial seguiu adiante sobrevivindo ás multisalas ou ao aluguer de VHS e ao traslado da actividade ás grandes áreas comerciais.  Actualmente é unha verdadeira institución da comarca ao ser un dos contadísimos cines independentes que sobreviven en España, cuestión que lle valeu unha mención no Festival Primavera do Cine en Vigo do pasado ano.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.