O Concello de Nigrán facilitará autobuses lanzadeira para o concerto de Wilco deste domingo 20 de agosto unindo desde as 18:45 horas e ata as 21:30 horas Porto do Molle (rúa das Pontes, ao carón do edificio tecnolóxico) co Pazo de Urzaiz, a 2’5 km de distancia. O recinto do concerto só disporá de prazas de aparcamento para persoas con mobilidade reducida e, ademais, son as festas patronais das Angustias a escasos metros, polo que desde o Concello recomendan a os asistentes que opten por esta solución. “É o concerto multitudinario máis agardado do verán, con máis de 3.500 entradas vendidas, e un fito no Espazo Fest, así que desde o Concello queremos colaborar a que a experiencia sexa redonda e que o aparcamento non sexa un problema”, explica o alcalde, Juan González, quen incide en que o retorno será a partir das 00:30 horas.
Este é o único espectáculo que os de Chicago ofrecerán en Galicia este ano presentando o seu último traballo, “Cruel Country”, un disco no que volven ás súas orixes e abrazan a música tradicional sen complexos. A velada coa banda de Jeff Tweedy en Espazo Fest comezará ás 19.30 horas coa apertura de portas do Pazo de Urzáiz que irá recibindo aos miles de fans que prometen encher un espazo tan máxico como este. E ás 21.00 horas Tré Burt actuará como teloneiro para que Wilco salte ao escenario ás 22:30 horas para ofrecer un directo co que moitos soñan desde o mesmo día do anuncio (aínda quedan algunhas poucas entradas á venda a través de teuticket).
Wilco é unha banda de rock alternativo de Chicago, Illinois, Estados Unidos, formada en 1994 polos membros restantes da banda de country alternativo Uncle Tupelo pouco despois da marcha do cantante Jay Farrar. Wilco sufriu diversos cambios desde a súa formación, con só o vocalista e compositor Jeff Tweedy e o baixista John Stirratt como membros fixos da banda desde os seus inicios. Desde principios de 2004, o resto da banda consta do guitarrista Nels Cline, os multiinstrumentistas Pat Sansone e Mikael Jorgensen e o batería Glenn Kotche. Wilco lanzou ao mercado oito discos de estudo, un álbum en directo e tres colaboracións: dous con Billy Bragg e un con The Minus 5.
Dise que poucas bandas combinaron de mellor forma tradición e vangarda desde as trincheiras do rock de raíz norteamericana que os de Chicago. A banda, comandada por Jeff Tweedy desde mediados dos anos noventa, loce nos seus historial discos tan excepcionais como “Summerteeth” (1999), “Yankee Hotel Foxtrot” (2002) ou “A Ghost Is Born” (2004). Cegadores traballos todos eles que fixeron historia e que marcaron un antes e un despois no curso do rock norteamericano.
