O Concello de Nigrán estreou este sábado no núcleo urbano da Ramallosa (ao carón da piscina) o seu primeiro horto urbano comunitario da man da cooperativa local ‘SomosTerra’, encargada tamén de dirixir este curso os cultivos nos centros escolares de Nigrán (promovidos tamén desde o Consistorio). En total, 40 familias anotadas participaron o sábado a mediodía na primeira xornada de plantación.
Nesta sesión inaugural explicouse o sistema de organización e funcionamento da horta para, a continuación, plantar unha azalea no centro que dá sombra a aromáticas (perexil, albáfega, tomiño, ourego, ruda…), ademais de sementar leitugas e allo porros, acelga vermella, taxetes, patacas e fresas. Todos eles cultivos asociados que se benefician mutuamente. A seguinte sesión estará adicada aos froitos propios do verán: xudía, cabaciño, tomates e pementos.
“Con este proxecto queremos promover o autocultivo nunha contorna que actualmente é moito máis urbana que o interior do municipio, fomentar hábitos saudables e potenciar a sensibilidade ambiental”, explica o alcalde, Juan González
A principal característica desta horta deseñada en 13 bancais que conforman un hexágono é que é comunitara, todos os usuarios realizarán os traballos conxuntamente polo ben común e non en parcelas de uso individual, distribuíndose a posteriori a colleita de xeito equitativo entre todos. Para elo, Diana, Eva e Raquel, de SomosTerra, establecen un calendario de tarefas para que os inscritos as sigan.
“Será un espazo de convivencia e de encontro entre veciños, por iso promoveremos tamén o intercambio de sementes e a creación dun banco que recompile as variedades locais”, explican.
“Esta zona verde da Praza Carlos Casares, que non se empregaba para nada e pasaba totalmente desapercibida, se transformará nun punto de encontro onde florecerán os mellores valores e dos que como goberno nos sentimos máis orgullosos de promover”, conclúe o alcalde.
