A empresa concesionaria do servizo de augas do Concello de Nigrán, Aqualia, iniciou o pasado mes de abril unha intensa campaña para vixiar, controlar e detectar posibles accións fraudulentas de consumo de auga sen contador ou “enganches irregulares” e evitar os consumos que non se rexistran e consecuentemente non se facturan. O obxectivo é manter un consumo responsable da auga tendo en conta os persistentes problemas de seca. Con este fin, incorporou ao servizo unha microcámara de inspección que permite realizar revisións polo míudo desde o interior das tubaxes.
No momento en que os inspectores detectan unha conexión fraudulenta iníciase o expediente sancionador que se pon en coñecemento do propietario do inmoble, ao que se lle require para que proceda inmediatamente a eliminar o mesmo, independentemente de que se remita a correspondente liquidación do fraude (se non regulariza a súa situación, dáse traslado á asesoría xurídica da empresa).
Aqualia inicia este procedemento para controlar e asegurar un consumo responsable da auga, por iso solicita a colaboración da veciñanza para advertir estes fraudes (nas propias oficinas ou ao teléfono de Atención ao Cliente de Aqualia 900 813 357, dispoñible as 24 horas).
Doutra banda, e co obxectivo de reducir as perdas de auga non rexistrada, o servizo leva anos usando equipos de electro-escoita para a detección de posibles avarías, tanto de maneira sistemática, como con carácter de urxencia, para localizar avarías concretas ou aumentos de consumo nun sector determinado, ao mesmo tempo que se revisa a rede para detectar anomalías, imperfeccións e necesidades de mantemento.
