Baiona paga outro millón de euros polo aparcadoiro do Aral

O Concello de Baiona aprobou, no último Pleno da Corporación, unha modificación de crédito a fin de seguir saldando a débeda contraída polo anterior goberno municipal con Abanca, debido a unha sentencia xudicial tralo rescate do aparcadoiro público do Aral, unha débeda, sinala o Goberno que preside Carlos Gómez “de preto dos catro millóns de euros”.

A débeda contraída estase a saldar co cargo ao remanente de Tesourería, é dicir, cos aforros municipais dos que terá que saír 1 millón de euros para facer fronte ao segundo prazo, pactado para este ano 2020. No 2021, haberá que aboar preto de outro millón de euros.

Tamén referido ao parking do Aral, o concelleiro Óscar Martínez, explicou que xa son máis de 100 as novas altas de persoas abonadas dende que se fixo pública a nova ordenanza reguladora deste aparcadoiro municipal e que entrou en vigor o pasado mes de agosto. Na nova ordenanza establécese que veciños e veciñas poden ter unha praza para o seu vehículo por só 32 euros ao mes.

Martínez subliñou a mellora que esta medida supón xa que, afirma, “dase a posibilidade dun estacionamento protexido e accesible no centro de Baiona a prezo económico. Ademáis lembra o responsable de Vías e Obras que a veciñanza, ten unha hora de aparcamento gratuíto todos os días da semana, incluídos sábados e domingos.