Durante os meses de setembro e outubro a Biblioteca Xela Arias de Chapela organizou unha serie de actividades de animación á lectura dirixidas ao público infantil e familiar. As iniciativas desenvolvidas foron todo un éxito de participación –as entradas esgotáronse– e de satisfacción do público asistente.
Para os máis pequenos, cativas e cativos de 1 a 4 anos, o narrador Caxoto ofrecíalles o seu contacontos ‘Levántate Xan!’.
Mentres, para os nenos e nenas con idades comprendidas entre os 6 e 12 anos, a Biblioteca Xela Arias ofrecía un extraordinario obradoiro de ciencia da man de Ciencia Divertida que se desenvolvía baixo o título ‘20.000 leguas de Lectura Divertida’.
Finalmente, Raquel Queizás levaba ata a biblioteca o seu espectáculo de narración oral e cinema ‘Cinema marabillas: ver para ler’.
A sede da biblioteca de Chapela escollía o espectáculo de Raquel Queizás, polo novidoso da súa proposta, e polo éxito que tivo o pasado ano na Biblioteca Valle-Inclán de Redondela.
Cinema marabillas: ver para ler é un espectáculo fantástico e cheo de maxia que atrapa aos espectadores, nenos e grandes, achegándolles os contos clásicos á vez que os descoñecidísimos primeiros filmes do cinema mudo.
Deste xeito, Raquel Queizás da a coñecer como foron os comezos do cinema, sen son e con música e voces en directo e achega este patrimonio cultural a nenos, nenas e adultos. Paralelamente, é tamén un xeito de animar a nenos e grandes a buscar estas historias nos libros que as recollen, e poñer de novo estes títulos no noso imaxinario.
A biblioteca de Chapela, que leva o nome da autora homenaxeada deste ano polas Letras Galegas, ven experimentando un aumento notable dos seus usuarios e da súa actividade dende a volta do verán, polo que a festa do Día das Bibliotecas, que celebrouse o día 14 por adiantado e que ten lugar oficalmente este mes, resultou un baño de ledicia para todos.
En definitiva, aseguran dende a Biblioteca Xela Arias “unha festa para animar a achegarse aos libros, que é o noso obxectivo”.
