16.5 C
Pontevedra
Mércores, 22 de Maio de 2024
Máis
    HomeComarcasRedondela'Conquistadoras' chegará a Cesantes mañá 3 de maio para quedar exposta durante...

    ‘Conquistadoras’ chegará a Cesantes mañá 3 de maio para quedar exposta durante todo o mes no paseo marítimo

    A exposición, que recolle nomes e rostros de mulleres “que exemplifican a importancia da participación da muller na sociedade”, continúa o seu percorrido parroquias de Redondela

    Unha vez rematado o seu tempo de exposición no paseo marítimo de Chapela, a mostra Conquistadoras, poderá ser visitada no paseo marítimo de Cesantes a partir do vindeiro 3 de maio onde quedará instalada durante todo o mes. A mostra continua, deste xeito, o seu percorrido polas parroquias de Redondela e cumprindo un dos seus obxectivos que non é outro que dar a coñecer á cidadanía o valor desas mulleres que deixaron patente a importancia do papel da muller na sociedade ao longo do tempo.

    Conquistadoras amosa a historia do esforzo de moitas mulleres que, dende o seus ámbitos de vida persoais e profesionais, “foron quen de ‘conquistar’ o dereito a ser elas sen necesidade de pedir o permiso deles”, tal e como dixo a alcaldesa de Redondela e concelleira de Igualdade Digna Rivas na inauguración da mostra na Alameda Castelao.

    A intención da exposición é achegar á veciñanza de Redondela un anaco da historia de Galicia e sobre todo “destas mulleres capaces de sobrepoñerse a todo tipo de adversidades para demostrar o que non debera precisar de xustificiación: calquera muller pode realizar os mesmo traballos que un home” asegura a rexedora redondelá.

    Rostros e semblanzas biográficas de María Pita ou de María Castaña, –que na época medieval enfrontáronse con armas na man aos abusos do invasor inglés e da igrexa, respectivamente–; símbolos da cultura, coma Rosalía de Castro ou Emilia Pardo Bazán; mulleres que abriron o camiño para o acceso á universidade, coma Olimpia Valencia; mulleres conectadas co máis selecto da cultura mundial do seu tempo, coma Maruxa Mallo; pintoras, pianistas, xornalistas… forman parte desta exposición.

    Cómpre salientar, con orgullo, que Galicia é berce de mulleres pioneiras en distintos eidos, sendo moitas delas as primeiras de todo o Estado español en chegar a ocupar eses postos “como sucede con María Luz Morales, a primeira muller en ser directora dun periódico de grande alcance (La Vanguardia); ou Irene González, quen foi a primeira porteira de fútbol nun equipo de homes”, lembra a alcaldesa de Redondela.

    Nesa loita pola igualdade e polos dereitos da muller, as mulleres de Redondela tamén estiveron presentes por iso nesta mostra hai rostros de veciñas que forman parte da historia redondelá como Paulina Sánchez, Ernestina Otero, Rita Regojo, Rita Otero… pero tamén mulleres que hoxe en día triunfan nos seus ámbitos, como Cristina Codesido (xerente dos vermús Petroni, que etiquetan todo en lingua galega acadando unha proxección internacional), a atleta Ana Peleteiro ou a directora de cine, natural de Cesantes, Diana Toucedo”.

    O carácter itinerante de Conquistadoras –ao igual que pasará con Mulleres da Illa actualmente exposta na Alameda Castelao–da cumprimento un dos obxectivo da Concellería de Igualdade: “que a loita pola igualdade, non quede cinguida a un so día, senón que sexa unha acción continuada ao longo de todo o ano porque é o único xeito de acadar unha sociedade xusta, igualitaria e decente”, afirma Digna Rivas.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.