Tralo anuncio da alcaldesa de Ponteareas, Nava Castro, que a Xunta de Galicia inicia o procedemento para a declaración do Corpus Christi como Ben de Interés Cultural (BIC), o Partido Socialista ponteareán subliña que dito anuncio non fai máis que confirmar o que o PSOE leva dicindo nos últimos anos “que a Xunta de Galicia tiña a documentación metida nun caixón e nin sequera abrira o expediente para a súa tramitación”.
A solicitude da declaración do Corpus como BIC foi realizada dende o anterior goberno de Ponteareas xa no ano 2017 e, tras o silencio absoluto por parte da Xunta de Galicia, requeríuselle información sobre o expediente en maio de 2020, marzo de 2022 e abril de 2022.
“Tivemos que agardar ata o 23 de xaneiro deste ano para que a Xunta nos convocase a unha reunión”, aseguran dende o PSOE de Ponteareas que xa non ten ningún tipo de dúbida en que a actual alcaldesa, Nava Castro, “paralizou e dormitou a documentación remitida dende o Concello sen nin sequera incoar o expediente administrativo; unha mostra máis das políticas caciquís do Partido Popular que non cesaremos de denunciar”.
Para os e as socialistas ponteareás, “esta actidude da Xunta de Galicia constitúe unha falta de respecto a todos os ponteareáns que temos na nosa festa do Corpus o máximo expoñente da nosa arte, convivencia, singularidade e paixón”.
A comezos deste ano foron varias as noticias que xurdiron en canto a declaración BIC do Corpus. Así o 20 de xaneiro un medio de comunicación publica que tres días máis tarde a Xunta de Galicia declarará BIC ao Corpus de Ponteareas. E o 19 de xaneiro o Partido Popular de Ponteareas instou á Xunta de Galicia para que axilizase esa declaración.
Tras unha reunión en Santiago entre o PP de Ponteareas e a Xunta de Galicia, a voceira do PP local anunciou “o compromiso da Xunta de facer efectiva a declaración nas vindeiras semanas”. Curiosamente cando se anuncia que a candidata do PP en Ponteareas será Nava Castro “non se volve escoitar nin pío da declaración BIC”, engade o PSOE.
“Unha vez máis o Partido Popular e a Xunta de Galicia mentiron e enganaron aos veciños e veciñas de Ponteareas, unha vez máis asistimos a unha perversa xogada política na que priman os intereses partidistas por riba das persoas”, conclúe o Partido Socialista de Ponteareas.
