A Mesa Xeral de Negociación do Concello de Salceda, convocada polo equipo de Goberno no día de onte, rematou con dúas importantes melloras para o cadro de persoal municipal ao aprobarse, por unha banda, a xornada laboral de 35 horas semanais e, doutra, a equiparación do persoal laboral e o persoal funcionario á hora de percibir un complemento do 100 % nas situacións de incapacidade temporal.
A alcaldesa de Salceda e responsable da área de Persoal, Loli Castiñeira, quen definiu a reunión como “unha xuntanza produtiva e en ton positivo que deu os resultados acadados”, amosou a súa confianza en que este sexa “o exemplo das diferentes mesas que terán lugar nas vindeiras semanas”.
Os acordos acadados establecen que, ao abeiro do recollido na disposición adicional 144 da lei 6/2018 de 3 de xullo de Presupostos Xerais do Estado para o ano 2018, a xornada laboral semanal de 35 horas para o persoal municipal que, no caso de Salceda, pasarán a desenvolver a súa xornada ordinaria en horario de 8:00 h a 15:00 h, coa excepción dos postos que conleven o desempeño de quendas de traballo, xornada partida, etc. A medida será aplicada de xeito inmediato a partires do 1 de febreiro.
Tamén en base á lei 6/2018, de 3 de xullo, de Presupostos Xerais do Estado para o ano 2018, a Mesa de Negociación aprobou para o persoal laboral que o complemento retributivo desde o primeiro día en situación de incapacidade temporal ou licenza por enfermidade, sumado á prestación do Réxime Xeral da Seguridade Social, alcance o cento por cento das súas retribucións ordinarias do mes de inicio da incapacidade temporal, equiparando deste xeito os dereitos do persoal laboral cos do persoal funcionario. Neste caso, a medida terá efectos retroactivos dende o 1 de xaneiro de 2020.
A Lei de Presupostos Xerais do Estado deixaba aberta a opción de acollerse a estas melloras aos Concellos, e así ven de facelo o Concello de Salceda de Caselas, aprobando as melloras en mesa coa representación sindical.
A convocatoria celebrada onte na Casa do Concello con asistencia da alcaldesa e responsable da área de persoal, Loli Castiñeira, representantes dos dous grupos do goberno (MS e PSOE) e representantes sindicais das tres forzas con representación no Concello (CSIF, CIG e CCOO) serviu tamén para que o equipo de goberno lles anunciase ao persoal municipal o inicio dos traballos para acadar a primeira RPT do Concello de Salceda, tal e como fora o seu compromiso a finais do pasado ano 2019.
Loli Castiñeira expresou a súa total confianza en que se “equipo de Goberno e representación sindical poñemos da nosa parte poderemos chegar aos acordos máis beneficiosos para ámbalas dúas partes, na busca de poder ofrecer un servizo da mellor calidade posible para a veciñanza de Salceda, que ó fin e ó cabo é a quen nos debemos tanto o Goberno como o persoal municipal”.
