“A COVID19 non nos fará perder a ilusión” con ese lema, toda unha declaración de intencións, Salceda de Caselas acendeu hoxe o seu alumeado de Nadal. Optou o Goberno local por un acendido virtual que se retransmitiu en directo a través das redes sociais do Concello. Unha a unha as rúas, prazas e edificios de Salceda foron enchéndose de cor e luz para dar a benvida ao Nadal.
Salceda presenta, nestes momentos, un nivel básico de restricións. Pese a iso, o Goberno local optou por evitar as aglomeracións, inevitables por outra banda, que se producen á hora de eventos destas características, así que tirou de imaxinación para acender, virtualmente, as rúas e gritar que “A COVID19 non nos fará perder a ilusión”. Que así sexa.