Cando están a piques de cumprirse os primeiros cen días dende a toma de posesión, o equipo de goberno de Salceda, formado por Movemento Salceda e PSdeG-PSOE, cualificou este primeiro período como “moi positivo” e, o máis importante, “moi productivo”. En tan só tres meses de andadura do mandato, Salceda aprobou xa inicialmente o Regulamento Orgánico Municipal e o Regulamento de honores e distincións.
Doutra banda, no Pleno extraordinario que se celebra mañá martes debatirase a aprobación inicial do orzamento de 2019, un orzamento que se incrementa en 700.000 € con respecto ao orzamento vixente (prorrogado de 2016) e que reflectirá a realidade actual do Concello.
O orzamento municipal duplica a cantidade reservada para o servizo de axuda no domicilio, que pasa de 200.000 a 400.000 €, garantindo deste xeito o incremento de horas de servizo que se viu producindo nos últimos anos.
Tamén neste período de 100 días, completouse a humanización da Rúa Compostela e se están a rematar as obras de urbanización tanto na zona da Devesa como na rúa Gándara. Así mesmo iniciáronse outras obras como a recuperación da antiga escola de Vendanova para atención de persoas con enfermidades neurodexenerativas como o alzhéimer e outras demencias, a mellora dos espazos anexos ao campo de fútbol do Penedo Redondo, ou os viais de Petoa e Borralliño-Pantel, e púxose en funcionamento un servizo tan importante como o novo gabinete de atención temperá compartido co Concello das Neves.
O equipo de goberno (MS e PSOE) valorou “moi positivamente estes primeiros cen días”, e amosou a súa satisfacción por unha etapa fructífera a pesares de contar nestes momentos con unha persoa menos no equipo por unha baixa médica da voceira do PSOE Verónica Tourón.
Un dos factores principais da boa marcha dos diferentes proxectos é sen dúbida a existencia dun equipo coexionado e traballando man a man na procura do mellor para Salceda, con dúas forzas políticas con cadanseu programa electoral pero que conseguiron artellar un programa de goberno conxunto que é o que están a levar a cabo nestes momentos.
Gela Ledo, Concelleira de benestar social e ensino (PSOE), manifestou que o seu partido “considera ilusionante e motivador todo o traballo que queda por diante”, amosando a súa satisfacción pola posta en marcha “de servizos fundamentais como o gabinete de atención temperá ou pola elaboración duns novos orzamentos en tan pouco tempo”, obxectivo fundamental do pacto de goberno, comprometéndose a seguir traballando pola veciñanza de Salceda.
Pola súa banda, a alcaldesa Loli Castiñeira, definía estes primeiros cen días como “moi productivos”, manténdose neste tempo reunións “con diferentes reunións do equipo de goberno cos colectivos veciñais, deportivos, culturais, etc.”.
A alcaldesa destacou tamén que, nestes tres meses, se teñen achegado ás parroquias en diferentes ocasións “para presentar o novo equipo e escoitar a veciñanza, co obxectivo de seguir a desenvolver unha acción de goberno centrada na veciñanza e empregando as diferentes asociacións como canle de comunicación máis representativa”.
