O Concello de Salceda de Caselas está a desenvolver diversas iniciativas coas que quere amosar o seu apoio incondicional ao comercio local “nesta situación especialmente complexa para o sector”, afirma o Goberno local. Así, as plataformas de comunicación das que dispón o Concello (páxina web e redes sociais) serven de medio para informar á veciñanza sobre os establecementos que permanecen abertos ao público ou aqueles que ofrecen servizo a domicilio. Ámbolos dous listados actualízanse coas solicitudes que achegan dende os propios comercios, conseguindo deste xeito unha guía de enorme utilidade para a veciñanza que a pode consultar dende os seus domicilios.
A concelleira de Comercio e tenenta de alcalde, Verónica Tourón, non dubidou en animar á veciñanza “a non esquecerse do comercio local, nin agora nin cando remate esta situación”. Tourón lembrou que en Salceda “existe unha ampla variedade de comercios que fan que non sexa necesario desprazarse a grandes superficies ou a internet”.
“Cando todo isto remate, –asegurou– debemos volver aos comercios locais con máis forza que nunca, pois ese será o inicio da recuperación da nosa vila”.
O Concello, a través da Concellaría de comercio, mantén ademais unha comunicación constante coas dúas asociacións de comerciantes existentes no municipio (ACISA e Tabernanova), nun exemplo de traballo conxunto que proporcione os mellores resultados para a poboación.
Tamén dende o CDL do Torrón se ofrece un servizo de asesoramento a persoas autónomas e PEMES, que se centra fundamentalmente nos temas relativos a tramitación de ERTES, prestacións por desemprego, prestacións extraordinarias, subvencións, etc, todos eles vinculados coa actual situación.
O sector do comercio estase a ver beneficiado tamén polas medidas económicas establecidas dende o Concello, que supoñen a anulación da taxa de terrazas ou a suspensión das taxas da praza de abastos e de mercado ambulante. Ademais o departamento de tesourería traballa xa no estudo para as medidas que poidan afectar ás taxas de recollida de lixo ou servizo de vado daqueles establecementos obrigados a permanecer pechados durante o estado de alarma.
O Concello quixo agradecer tamén as iniciativas privadas de apoio ao comercio, como a que está a levar a cabo Electra Alto Miño, que está establecendo medidas para rebaixar o coste eléctrico e outros servizos de negocios pechados ou con servizo moi disminuído, como a suspensión do cobro da fibra óptica ou a rebaixa da potencia eléctrica.
Loli Castiñeira, alcaldesa de Salceda de Caselas é consciente que o traballo que se realiza dende o equipo de Goberno, “tal vez non sexa o máis popular, solo agardamos que sexa o máis eficaz. Esa é a miña gran preocupación e responsabilidade”.
