A praza de abastos de Salceda segue a ser o principal punto de abastecemento de productos frescos en Salceda durante o estado de alarma. O mercado mantén a súa actividade diaria de venta de carne, peixe fresco e froita, así como o servizo de bancadas dos mércores para a venta de peixe.
Nestes tempos complicados, “a praza de abastos segue a ser símbolo da venda de produtos frescos e de calidade”, asegura a concelleira de Comercio, Verónica Tourón, quen asegura que, dende o Concello “estanse a poñer todas as ferramentas precisas para que a actividade poida seguir a desenvolverse con seguridade” e lembra que os mércores “seguen a ser días de venda de peixe fresco en Salceda”.
Nese sentido, dende o comezo da crise do COVID-19, dende o Concello adoptáronse todas as medidas de seguridade precisas para garantir a seguridade sanitaria tanto de usuarios e usuarias coma dos praceiros e praceiras. A Policía Local e Protección Civil controlan o aforo os mércoes, día de venta de peixe, garantindo deste xeito a seguridade das persoas que se acheguen ao edificio a facer as súas compras de producto fresco.
Ademais os diferentes postos fixos da praza teñen establecido un sistema de encargas e de servizo a domicilio, evitando tamén deste xeito as esperas no inmoble, e minimizando así os riscos de contaxio que poidan producirse.
A alcaldesa de Salceda, Loli Castiñeira, aposta decididamente “polo apoio ao comercio local” e nesa liña o Concello de Salceda, lembra a rexedora local, tomou dende o primeiro momento medidas económicas “como a suspensión das taxas das terrazas ou o aprazamento das taxas do mercado municipal. Servizos como a preparación de pedidos por encargo ou o repartos domicilio contribúen a que a nosa praza de abastos poida seguir a abastecernos nestes días complexos”.
