A plataforma ‘De barrio’ bota a andar tamén no Concello de Salceda con 23 comercios inicialmente, que se prevé sexan máis nos vindeiros días. O Concello colabora deste xeito co sector do comercio, asumindo os custos das altas no servizo e de mantemento neste primeiro ano. O proceso realizouse en contacto directo coas dúas asociacións de comerciantes existentes no municipio: ACISA e Asociación de comerciantes da Tabernanova.
A concelleira de Comercio de Salceda, Verónica Tourón, sinalaba a importancia de poñer á disposición da hostalería e comerciantes “todas as ferramentas precisas para adaptarse ao novo contexto que estamos vivindo” o que reafirma a aposta do Goberno local “pola dinamización comerial”.
A crise do coronavirus e o seu consecuente confinamento puxo en auxe o sistema de compra on line, en detrimento en moitas ocasións do comercio local. Precisamente buscando novas alternativas naceu esta plataforma que ofrece un servizo de venta a través de internet coa diferenza de que é feito directamente polo pequeno comercio. A iniciativa, que xa funciona en Concellos como Vigo, Gondomar, Nigrán ou Salvaterra de Miño, chega agora a Salceda onde se agarda que sexan moitos os comercios que participen.
A través do enderezo www.dbarrio.com, as persoas que fagan uso deste servizo poderán escoller e adquirir o producto que máis lle interese no comercio que prefira, engadíndose ademais a facilidade de poder elexir cómo, cando e onde quere que lle sexa entregado.
Nestes días os comercios adheridos ao programa están a cargar xa a súa oferta de produtos na plataforma, polo que xa se pode acceder ao servizo segundo se vaian incorporando o resto de locais adheridos.
Iniciativas como esta, sinalaba a alcaldesa de Salceda, Loli Castiñeira, “son un xeito de coidar o pequeno comercio” que é, engadiu,”unha das prioridades, que nesta crise do coronavirus se fixo aínda máis imprescindible”.
Esta iniciativa ofrece solucións de presente pero sobre todo –apuntou Castiñeira– de futuro, por iso decidimos que o Concello de Salceda dera un paso importante coa financiación da mesma”.
A alcaldesa de Salceda non quixo esquecerse “do traballo realizdo polas dúas asociacións de comerciantes” ás que lles agradeceu o seu labor “tanto durante esta crise como no resto do ano”.
