As tardes de humor regresan á Vila do Louro polas Festas do Cristo. Tres grandes monologuistas se darán cita na praza Arquitecto Antonio Palacios para facer as delicias dos amantes da comedia.
O domingo 24 ás 21 h será o cómico Víctor Grande quen suba ao escenario; o luns 25 de setembro ás 20:30 horas o fará Pepo Suevos e o xoves 28, tamén ás 20:30 h pechará o ciclo Oswaldo Digon, cuxo monólogo previsto para hoxe foi adiado polo mal tempo.
Víctor Grande, cómico e zurdo
Tal e como el mesmo explica, todo empezou en setembro de 1979, polo menos para el. Tras unha infancia empapada polso 80 e unha mocidade efervescente nos 90, entrou no novo século facendo os seus primeiros pasos na comedia.
En 2001, ao Kubrick, subiuse por primeira vez a un escenario e de aí xa non lle baixa nin Jobs. Descubriu os praceres da radio, fixo un pouquiño de tele, escribiu guións e mesmo publicou un libro. Tras dez anos deuse conta de que xa tiña historias que contar e algún que outro ensino xeral básico, por iso é polo que agora se lle de tamén por dar charlas e clases de comedia.
Pepo Suevos, un dos humoristas galegos máis rodados
Este cómico que se pagou os estudos de económicas traballando de porteiro de discoteca, descobre casualmente alá polo ano 2000 que o seu é a comunicación. Empeza nun taller de narración oral co arxentino José Campanari, e a partir de aí precipítanse os acontecementos. As súas características físicas (un animal con roupa de 130 quilos) permítenlle debutar como actor na Televisión de Galicia, e a popularidade que isto lle reporta, dálle pé para iniciar unha carreira como cómico que acaba sendo a base da súa actividade artística.
Así, Pepo Suevos é un dos humoristas máis rodados no mundo dos monólogos e o humor en directo en Galicia, con máis de mil oitocentas actuacións en bares, auditorios, galas, etc. Ademais da súa faceta de monologuista (a máis explotada, sen dúbida), Pepo exerce de animador, actor de dobraxe, deportista e mesmo locutor de radio.
E xa se nos metemos no mundo do audiovisual, Pepo Suevos ten unha gran experiencia como actor para cinema e televisión: participou tanto en series galegas como “Caseiros” (produción estreada en 2014 na que Pepo é protagonista), “Mareas vivas”, “Terra de Miranda”, “Matalobos” ou “Pazo de familia” (TVG) e estatais (“Piratas”, ou “Aquí paz y después Gloria”, de Telecinco; ou “Fariña”, de Antena 3), como en programas de éxito, “Tourilandia” ou “Land Róber” (aquí tamén traballou como guionista, outro dos seus “oficios”), e longametraxes para o cinema, como “Secuestrados”, “Entre bateas” ou “Heroína”, “A esmorga”, “La playa de los ahogados” ou “As bestas”, de Rodrigo Sorogoye.
Oswaldo Digón, un galego cun humor moi teatral
Oswaldo Digón é un actor, guionista, presentador e monologuista galego cun humor moi teatral. É capaz de escenificar todos os detalles nas súas historias.
Empezou a súa carreira como contacontos e máis adiante traballou como actor de teatro profesional. Foi guionista dos programas de humor ‘Tourilandia’ e ‘A Casa da Conexa’ para TVG, pero destaca máis o seu paso polos escenarios, coa realización de espectáculos como ‘Los duguis World Tour’, ‘HAIPOD’, ‘Las noches de monólogos 10’ e ‘Las noches de El Club de la Comedia’.
No 2003 gañou o concurso de comedia Fórum Comedia co espectáculo escrito e interpretado por el mesmo ‘Historias da miña Historia’ co que estivo dúas tempadas no Teatreneu de Barcelona.
