O Concello do Porriño acometerá a reparación das pontes de madeira do Louro para garantir a seguridade dos viandantes. Estas pontes, instaladas no ano 2010, presentan serios danos fundamentalmente nas partes de madeira que serven de base e que sofren a degradación producida pola humidade ao estar en contacto permanente co terreo. Isto provoca o fallo dalgunha das pezas da base que resta estabilidade na plataforma coa conseguinte rotura de táboas, ademais de presentar risco na estrutura principal.
“Trátase de 3 pontes de gran tamaño que permiten cruzar o Louro e unha cuarta pasarela de menor tamaño que cruza un pequeño cauce afluente e que forma parte da senda peonil que percorre a marxe do río”, explicou o concelleiro, Marcos Martínez.
Para solucionar esta situación levantaranse as pontes para a sustitución da estrutura de base dos mesmos con novos elementos de madeira ou con outra solución constructiva que poida ser autorizada pola Confederación Hidrográfica do Miño-Sil. Repararase a plataforma de paso renovando as pezas en mal estado e aplicando ao conxunto un tratamento para reducir a resbaladicidade
“Asemade, na ponte metálica que cruza o río augas abaixo paralela ao vial de acceso a Pontellas, as taboas que forman o pavimento están deterioradas e levarase a cabo a súa reposición con taboas que polo seu deseño raiado e o seu tratamento superficial eviten a resbalabilidade”, engadiu o edil.
Así, serán 5 as estruturas sobre as que se actúe de maneira urxente, o que requerirá unha inversión de 72.000 euros que xa foi consignada polo goberno municipal.
“A senda do louro é un lugar moi concurrido ao que acoden a diario moitos porriñeses e o estado destas pontes supón un risco, non só porque se atopa resbaladizo senón porque as taboas levantadas poden provocar caídas”, concluíu o alcalde, Alejandro Lorenzo, “Por iso, urxe acometer estas melloras. Queremos poñer en valor esta contorna natural e para iso, ademais dos proxectos que temos en marcha para o parque do río, hai que manter en boas condicións a senda peonil, tanto de limpeza como a nivel estrutural. Queremos que a veciñanza siga vivindo e disfrutando do noso río”.
