24.2 C
Pontevedra
Venres, 29 de Setembro de 2023
Máis
    HomeBaixo MiñoO RosalO Rosal amosa as súas boas prácticas ambientais ao presidente da Illa...

    O Rosal amosa as súas boas prácticas ambientais ao presidente da Illa do Príncipe

    O Concello do Rosal mantén unha aposta decidida pola sostibilidade ambiental en todas as áreas municipais co obxectivo claro de converterse nun modelo de avance sostible, respectuoso e responsable do rural galego. Ao longo dos últimos anos, o Goberno municipal implementou unha serie de medidas e boas prácticas que a alcaldesa, Ánxela Fernández Callís, amosou este mércores ao presidente da Rexión Autónoma do Príncipe, Filipe Nascimento, que visitou O Rosal dentro dun encontro previo ao IV Foro da Coooperación Municipalista da Lusofonía, impulsado polo Fondo Galego de Cooperación e Solidariedade e que se celebrará do 23 ao 26 de outubro nesta illa africana pertencente á República Democrática de São Tomé e Príncipe e declarada Reserva da Biosfera pola UNESCO.

    Rexedora e equipo de Goberno recibiron na Casa do Concello a Nascimento e ao asesor gobernamental Antonio Machiaba para presentarlles as liñas de actuación en materia de sustentabilidade ambiental, así como as obras de recuperación de espazos públicos, “unha estratexia coa que buscamos construír O Rosal das persoas, transformando as nosas prazas e rúas fomentando lugares de encontro e convivencia, unha mobilidade sostible e segura, ao tempo que se dinamiza a economía local e se fixa poboación”, explicou Fernández Callís.

    A delegación de Illa Príncipe puido coñecer así realidades como a os dous ecoparques creados no Rosal nos últimos anos ou a Explanada do Horizonte, que ademais de potenciar o valor natural e paisaxístico do municipio dun xeito sostible foi galardoado con importantes recoñecementos como o Premio Gran de Area 2020 de Aportación á arquitectura do Colexio de Arquitectos de Galicia ou o Premio Internacional de Arquitectura e Natureza Simonetta Bastelli.  

    Durante o encontro, a alcaldesa tamén esbozou as principais liñas seguidas dende o Concello para a transformación enerxética de todo o municipio, reducindo as emisións e camiñando nunha transformación acelerada cara a eficiencia enerxética e a sostibilidade ambiental a nivel municipal, social ou veciñal. Ánxela Fernández Callís destacou así o traballo realizado para o cambio de luminarias, para o que o Goberno municipal captou 1,5 millóns de euros ao abeiro do Programa DUS 5000, a reforma progresivas das escolas unitarias apostando ademais por unha educación de proximidade e unha recuperación patrimonial, a implementación da compostaxe e da transformación no tratamento de residuos, a creación das comunidades enerxéticas ou o cambio de fontes de consumo fósil en todas as instalacións municipais por enerxías renovables.

    LIBROS

    Alberto Mancebo, «O que me quedaba por dicirche»

    Poderiamos afirmar que nos últimos meses algo se está a mover na literatura galega pola aparición de novos autores que nos sorprenden gratamente pola frescura das súas propostas.

    Antón Riveiro Coello, «Hotel Carioca»

    Antón Riveiro Coello volve a demostrar a súa rara habilidade para a construción de historias nas que xoga a mantenta coas personaxes e mais co lector.

    Branca Novoneyra, «As cunchas baleiras»

    Logo dunha longa década de escrita íntima e de reflexión, Branca Novoneyra decide facer público un novo poemario de clara vocación estética e simbólica como é «As cunchas baleiras», que ela mesma concibe como unha «antoloxía» dos versos que saíron da súa pluma ao longo de todo este tempo.