Os equipos de extinción dan por finalizado un incendio declarado esta madrugada no interior dun supermercado na Guarda.
Arderon fornos e cámaras frigoríficas dentro dun centro de transformación de subministro sen causar danos persoais.
A alerta saltou ás seis desta mañá mediante as sereas de aviso do establecemento, que foron percibidas por unha patrulla da Garda Civil. Inmediantamente, os axentes das forzas da orde contactaron co 112 Galicia para solicitar medios para a extinción dun incendio do que aínda descoñecían a orixe.
Deseguido, os xestores do Centro Integrado de Atención ás Emerxencias de Galicia avisaron aos membros do GES de A Guarda e aos Bombeiros do Baixo Miño para extinguir o lume unhas dúas horas despois sen que se produciran danos persoais. Segundo explicaron os equipos de intervención, o incendio orixinouse nun centro de transformación de subministro, o que afectou directamente a cámaras frigoríficas e fornos.
Malia ter rematado, os equipos seguirán un tempo no lugar para ventilar o establecemento, situado na Rúa Diego Antonio González.
